“ҲАЖ – 2015” МАВСУМИ БОШЛАНДИ
Фуқароларимизни ҳаж ва умра зиёратига сафарбар этиш ўтган йиллардаги мавсумлар каби Юртбошимиз Фармонларига мувофиқ тузилган “Ҳаж ва Умра тадбирларини ташкил этиш ва ўтказиш бўйича Жамоатчилик кенгаши” нинг қарорлари ва тавсиялари асосида ташкил этилмоқда.
Ўтган 24 йил мобайнида муборак сафарларни ташкил этиш борасида катта ютуқларга эришилди. Бугунги кунда бу ишлар янада такомиллашди ва зиёратчиларимизга кўплаб қулай шароитлар яратилди.
Бунинг учун Яратганга чексиз шукурлар қилишимиз даркор.
Бу йили ҳаж зиёратига олиб бориш учун рейсларнинг зиёратчиларга қулай бўлиши учун шу йилнинг 3-14 сентябрь кунлари, олиб келиш эса 27 сентябрдан 8 октябрга қадар “Ўзбекистон ҳаво йўллари” миллий авиакомпаниясининг “БОИНГ” русумли ҳаво кемаларида Тошкент, Наманган, Термиз, Бухоро, Урганч, Қарши ва Самарқанд шаҳарларидан учирилиши режалаштириб қўйилди.
3 сентябрь куни ҳар йилги тажрибадан келиб чиққан ҳолда, Тошкент шаҳри зиёратчилари учиш вақтларидан 5 соат олдин сафарга тайёргарлик кўриш мақсадида тузилган жадвалга мувофиқ, “Новза” масжидига йиғилдилар. Уларга ўз гуруҳи раҳбари томонидан керакли тавсиялар ва кўрсатмалар берилди. “Ахборот” ва “Давр” телекўрсатувлари мухбирлари бўлажак ҳожи ота ва ҳожия оналарнинг сафар таассуротлари билан ўртоқлашиш мақсадида улардан интервьюлар олишди.
Зиёратчи отахон-онахонларимиз ўз интервьюларида юртимизда ҳукм сураётган тинчлик-осойишталикнинг қадрига етиш муҳимлигини айтиб, юртимиз равнақи, элимиз фаровонлигини тилаб Аллоҳ таолога дуолар қилишди. Шунингдек, улар муборак ибодатни юксак савияда ташкиллаштиришда камарбаста бўлган мутасадди ташкилотлар, ишчи гуруҳи аъзолари ва хусусан Юртбошимизга чексиз миннатдорчиликларини билдирди.
Зиёратчиларни Тошкент халқаро аэропортига ҳурмат – икром билан шинам автобусларда ташилди. ЎМИ раиси, муфтий Усмонхон Алимов ҳазратлари раҳбарлигида Ўзбекистон ҳаж делегацияси, ишчи гуруҳи аъзолари, шифокорлар, ошпазлар ва зиёратчилардан иборат жами 400 дан зиёд зиёратчилар Муборак Ҳаж ибодатини адо этиш ниятида икки рейсда Саудия Арабистони Подшоҳлигига жўнаб кетдилар.
Зиёратчиларимиз Мадинаи мунавварада “Масжид ан-Набавий” дан унча узоқ бўлмаган “Жавҳарат ал-Аъсима” меҳмонхонасига ва Маккаи Мукаррама шаҳрида эса тўрт бинодан иборат ҳашаматли “Аброж Маса ал-Муҳаммадия” меҳмонхонасига жойлашадилар. Меҳмонхоналарда улар 3 маҳал миллий таомлар, иссиқ чой ва яхна ичимликлар билан таъминланади.
Ҳаж арконлари ва ҳожиларимиз шароитини ёритиб бериш учун ишчи гуруҳ таркибидаги Тошкент ислом университети “Зиё” студияси вакиллари томонидан интервью ва репортажлар олиниб, “Ўзбекистон” телеканали орқали намойиш этилиши режалаштирилган.
Маълумки, Саудия Арабистони Ҳаж вазирлиги МДҲ мамлакатлари ичида Ўзбекистон ҳожиларининг бундай тартибли, намунали ва ҳавас қиладиган даражада ташкил этилганини мамнуният билан эътироф этмоқда.
Аллоҳ барчамизга ҳаж ибодатларини адо этишни насиб этсин.