ОАВ: Маккада ёнғин туфайли меҳмонхонадан 1,5 минг нафар ҳаж зиёратчиси эвакуация қилинди
Саудия Арабистонига ҳаж амалини адо этгани келган камида 1,5 минг зиёратчи Маккадаги меҳмонхонада чиққан ёнғин туфайли эвакуация қилинди. “Ал-Вафд” газетаси электрон версиясининг маълум қилишича, ёнғин оқибатида яманлик 4 киши жароҳат олган.
Қироллик мудофаа кучлари 15 қаватли турар-жой мажмуасида чиққан ёнғинни баратараф этишга муваффақ бўлишди. Дастлабки маълумотларга кўра, ёнғин меҳмонхонанинг 11-қаватидаги хоналарнинг бирида электр симидаги носозлик туфайли содир бўлган. Қутқарувчилар “одамларнинг ҳаётига ҳеч нарса хавф солмаётганини” тасдиқлаганларидан кейин, зиёратчилар яна ўз хоналарига қайтганлар.
17 сентябрда ёнғин туфайли асосан осиёлик зиёратчилар жойлашган меҳмонхонадан мингдан зиёдроқ зиёратчи эвакуация қилинган эди. Ёнғин 11 қаватли меҳмонхонанинг 8-қаватида юз берган, оқибатда 2 киши жароҳат олган эди.
