Маккада ҳаж пайтида қозоғистонлик аёл юрак хуружидан ҳалок бўлди
Қозоғистонда ҳаж сафарига борувчи қозоғистонлик ёши катта зиёратчиларга албатта бирор яқинлари ҳамроҳлик қилишлари белгилаб қўйилди, деб хабар бермоқда Қозоғистон мусулмонлар диний бошқармаси матбуот хизматига иқтибос келтирган ҳолда nur.kz нашри.
Бу қоида Маккада ҳаж пайтида Мансурова фамилияли 78 ёшли қозоғистонлик аёлнинг ҳалок бўлганидан кейин киритилди. Кекса аёл Саудия Арабистонидаги маҳаллий шифохоналардан бирида юрак хуружидан жон берди. Қайд этилишича, кекса аёл ҳаж сафарига бир ўзи йўл олган.
Маълум қилинишича, Мино водийсида юз берган фожиада ҳалок бўлганлар орасида қозоғистонлик фуқаролар бўлмаган.
“Қозоғистонликларни ҳажга юбориш билан шуғулланувчи компаниялардан тезкор хабар олинди. Дастлабки маълумотларга кўра, жабрланганлар орасида қозоғистонлик фуқаролар йўқ. Қозоғистонлик зиёратчилар Жамаротга олиб борувчи кўприкнинг фожиа юз бергандан фарқли бошқа йўли орқали ҳаракатланишган. Олий муфтий буйруғи билан зиёратчилар орасида хавфсизлик масалалари бўйича тушунтириш ишлари олиб борилмоқда. Зиёратчиларнинг соғлиғи шифокорлар назоратида. Зиёратчиларнинг аҳволини назорат қилиш учун Қозоғистон вакилларидан комиссия тузилди, унинг таркибига Маккага зиёратчиларни юбориш билан шуғулланувчи фирмалар ва Қозоғистон мусулмонлар диний бошқармаси вакиллари киритилди”, деб маълум қилди Қозоғистоннинг Маккадаги вакили Ғилимбек Мажиев.
Қозоғистон ТИВ маълумотига кўра, айни пайтда Маккада 4 мингга яқин қозоғистонлик зиёратчилар ҳаж амалини адо этишмоқда.