Макка яқинидаги тиқилинчда 14 нафар ҳиндистонлик ҳалок бўлди
Саудия Арабистонининг Макка шаҳри яқинидаги Мино водийсида юзага келган тиқилинчда энг камида 14 нафар ҳиндистонлик ҳалок бўлди, дея хабар берди Ҳиндистон Ташқи ишлар вазири Сушма Свараж 25 сентябрь куни.
“Бизнинг Жиддадаги бош консуллигимиз тиқилинч вақтида 14 кишининг ҳалок бўлганини хабар қилди. Жароҳат олган 13 киши шифохонада”, - дея маълум қилди вазир ўзининг Twitter микроблогида. Унинг сўзларига кўра, маҳаллий ҳукуматга ҳиндистонлик кўплаб кўнгиллилар кўмак кўрсатишмоқда, жасадлар шахсини аниқлаш жараёни бошланди.
Эслатиб ўтамиз, фожеа 24 сентябрь куни эрта тонгда Макка яқинидаги Мино водийсида содир бўлди. Иккита улкан одамлар оқими чодирлар шаҳарчасидан шайтонга тош отиш амали бажариладиган ҳудудга элтадиган йўлдаги чорраҳада тўқнаш келиб қолган. Кўчалар кесишмасида улкан тиқилинч вужудга келиб, натижада 717 киши ҳалок бўлди, энг камида 863 зиёратчи жароҳатланди.
Саудия Арабистони қироли Салмон ибн Абдулазиз Ал-Сауд ҳаж пайтида юз берган кўплаб инсонлар ўлимига олиб келган фожиалар ортида ҳажнинг ўтказилиш тартибини қайта кўриб чиқишга буйруқ берди.
