ЖОНИВОР СЎЙИЛИШИГА ДОИР
Голландиянинг бир миллиондан ортиқ мусулмон аҳолиси кундалик ишни ўз дини ва урф-одатига кўра амалга оширади. Масалан, туя, мол, қўй ва эчки каби жонивор гўштини фақат “Бисмиллаҳ” ила сўйилганини истеъмол қилади. Нидерландлар “Ҳайвонот оламини муҳофаза қилиш” ўнг қўл партияси бундай сўйиш жониворни қийнаши, уни бир зумда ўлдирадиган ток ёки бошқа замонавий услубдан фойдаланиш кераклигини таъкидлайди.
Лекин мусулмонлар уюшмаси раҳбарияти бунга ўз мулоҳазасини билдирди: “Биринчидан, Иброҳим Халилуллоҳ ўргатганларидек, Аллоҳ таолога ҳамд айтган ҳолда пичоқ билан жонини узиш лозим. Иккинчидан, унинг ўз одоб ва қоидаси бор. Ҳар ким бу ишга қўлини урмасдан “чумчуқ сўйса ҳам қассоб сўйсин” деган нақлга амал қилиш жоиз. Учинчидан, қассоб қурбонлик қилаётганда пичоқни айнан икки йўғон томирини баробар узади. Натижада жонивор қирқ сонияга бормасдан енгилгина жони узилади. Тажриба ва таҳсилотга кўра, энг азиятсиз сўйиш Ислом динида мукаммал акс эттирилгани шубҳасиз.
Азизхон ҲАКИМОВ тайёрлади.
