ЭНГ КИЧИК КУТУБХОНА
Уяли телефонларнинг такомиллашиб бориши натижасида Британиянинг қизил рангли телефон шаҳобчалари тарихга айланиб қолмоқда. Лекин улар ахлатхоналарга ташланмаяпти. “British Telecom” алоқа ширкати ушбу шаҳобчаларни истаган кишиларга сотяпти. Баъзи харидорлар душхона, омборча ёки пойафзал тозалайдиган жой сифатида фойдаланишаётир. Уэстбери Мэндип шахарчасининг аҳолиси эса улардан бирини рамзий 1 фунт нархида сотиб олиб, туну кун ишлайдиган, дунёдаги энг кичик кутубхонани ташкил қилишди.
Деворларини китоб жавонига мослаштириб, диск ва DVDларга тўлдиришди. Кутубхона каталогида 100 дан ошиқ мавзулар бор. Бу ерда кутубхоначини учратмайсиз, ҳамма нарса онгли китобхонлар учун мўлжалланган. Одамлар уйдан олиб келинган китоблар билан кутубхонани тўлдиришади, ўз навбатида, қайтариш шарти билан олиб кетишади. Минг нафарга яқин аҳоли орасида кутубхона аллақачон тилга тушган. Баъзан китоб олиш учун навбатда туришга тўғри келмоқда.
Азизхон ҲАКИМОВ тайёрлади
