ДИНЛАРАРО МУЛОҚОТ МУКОФОТИ СОВРИНДОРИ
1927 йилда суриялик диншунос олим Муҳаммад Нофеъ Шалабий томонидан турли динга мансуб олимларни ҳамкорликка чақириш мақсадида “Динлараро мулоқот” мукофоти таъсис этилган эди. Мукофот – Самовий динлараро муносабатлар мавзусида тадқиқот ишлари олиб борадиган мусулмон бўлмаган академик, профессор-ўқитувчи ва тадқиқотчиларга топширилади.
Бу йил мазкур мукофотга Германиянинг Ганновер шаҳридаги “Лейбниц” университети профессори, академик Питер Антс сазовор бўлди. Унга ушбу мукофот Германиядаги Ислом архившунослигига асосланган марказий институт ҳайъати томонидан топширилди.
Академик Питер Антс ислом ва христиан динлари ўртасидаги муносабатлар соҳасида кўп йиллардан бери илмий тадқиқот олиб боради. У 1973 йилдан 2012 йилгача Германиянинг Ганновер шаҳридаги “Лейбниц” университетида “Ислом шариати” факультетида мударрислик қилган. Унинг турли динлар фаолиятига оид бир қанча илмий тадқиқот асарлари мавжуд.