Қалб хотиржамлиги сири
Америка Соғлиқ тадқиқотлари миллий марказида Давид Ларсон томонидан америкаликлар орасида диндор ва эътиқодсиз кишилар ўртасида қилинган қиёсламалар натижасида жуда ҳайратланарли маълумотлар тақдим этилди. Масалан, диндорлар умуман эътиқодсиз кишиларга қараганда юрак касаллигига 60 фоиз кам учрар экан. Ўз жонига қасд қилиш ҳодисалари диндорлар орасида умуман йўқ. Қон босимининг хавфли кўринишлари ҳам кўп эмас экан.
Психологлар бунга ўхшаган натижаларни “психологик таъсир” деб атайдилар. Эътиқодли кишининг кайфияти кўтарилиб, бу ҳол соғлиққа фойда берар экан. Аллоҳга бўлган эътиқод бошқа қандайдир кайфият кўтарувчи хусусиятлардан таъсири анча кучли экани тасдиқланди.
Харвард Тиббиёт факултетидан доктор Херберт Бенсоннинг диний эътиқод ва вужуднинг соғлиғи ўртасидаги бошқа тадқиқотларида ҳам диққатга сазовор натижалар юзага чиққан. Бенсон эътиқодсиз киши бўлишига қарамасдан, Аллоҳга бўлган эътиқод ва ибодатлар инсон соғлиғи учун бетакрор даражада ижобий таъсир кўрсатади, деган фикрга келган. Бенсон “бошқа ҳеч қандай эътиқод Аллоҳга бўлган эътиқод каби зеҳнга ҳузур бермаган”, деган натижага эришганини айтмоқда.
Медицина дунёси аста-секин тушуна бошлаган бу ҳақиқат Қуръонда “Огоҳ бўлинглар, қалблар фақат Аллоҳнинг зикри билан хотиржам бўлади” (Раъд, 28) ояти билан билдирилган. Аллоҳга ишонган, У Зотга дуо қилган инсонларнинг бошқалардан ҳам руҳий, ҳам жисмоний жиҳатдан соғлом эканларининг сабаби яратилишларига мос ҳаракат қилишларидадир. Инсоннинг яратилишига тескари бўлган фалсафа ва тузумлар инсонларга доимо алам, ғам, дард ва руҳий тушкунлик олиб келади.
Замонавий тиббиёт илми кашфиётлар соясида бу ҳақиқатни тан олиш йўлидан кетмоқда. Патрик Глейннинг ифодаси билан айтсак, “замонавий тиббиёт даволашнинг моддий йўлларидан ташқари бошқа йўллари ҳам борлигини қабул қилишга қараб олға интилмоқда”. Интилмасдан ўзга иложи ҳам йўқ. Чунки инсонни фақат моддий дори-дармонлар билан тўлиқ даволаб бўлмаслиги исбот талаб қилмас ҳақиқатга айланди...
“Илоҳий мўъжизалар” китобидан
