Азон эшитганда нима дейилади?

Ассалому алайкум. Бизда кўпчилик азон айтилаётганда азон калималарини айтиб туришни одат қилишган. Лекин уларнинг айтаётган баъзи калималарни ҳадисларда учрамадим. Мисол учун, муаззин Аллоҳу акбар деганда, Жалла жалолуҳу дейишади, муаззин Ҳайя ъалал фалаҳ деганда, Маа шаа Аллоҳу кана ва маа лам яшаъ лам якун дейишади. Лекин, ҳадисларда азон калималарини эшитганда ўша калималарнинг айнан ўзи такрорланади ёки Ҳайя ъалаларда Лаа ҳавла ва лаа қуввата иллаа биллаҳини айтилади, дейилган. Юқоридаги каби зикрларни қўшиб айтиш бирор китобда келганми?

Бева аёл билан гаплашиб юрса бўладими?

Ассалому алайкум. Теварак-атрофда кўп бева аёллар бор. Одамлар улар ҳақида турли гапларни гапиради. Уларда ҳам нафс бор, дейишади. Бева аёлларни ёмон йўлдан қайтариш учун ҳимоячи сифатида гаплашиб юрса бўладими?

“Фолга ишонма, фолсиз юрма” нима дегани?

Ассалому алайкум. Халқимиз орасида Фолга ишонма, фолсиз юрма деган гап бор. Буни қандай тушуниш керак? Динимиз фолни қоралаганини биламан, лекин қай ҳолатларда фолсиз юрмаслигимиз керак ёки мумкин? Шунга ойдинлик киритсангиз!

Тўй харажатларини куёв томон кўтарса...

Ассалому алайкум. Уйланаётгандим. Келиннинг сарпосини, мебел ва гиламини зиммамга олдим. Буни келиннинг отаси ва ўртада турган одам билади. Тўғри иш қилаётганимни биламан, лекин тўйхона, хонандалар хизмати, тасвирга олиш, автомашина ижараси каби харажатларни ҳам кўтаряпман. Қарз олиб қилаётганим йўқ, ҳалол меҳнатим эвазига топган пулимдан қиляпман. Бироқ... Аллоҳ берганини беҳудага сарфлаётганим, онамнинг орзу-ҳаваслари йўлида исрофгарчиликка йўл қўяётганим учун Аллоҳнинг ғазабига учрашдан қўрқаяпман!.. Одилхон қори ака, ўзингиз маслаҳат беринг! Токи Аллоҳнинг ғазабидан узоқ бўлай, раҳматидан четда қолмай!

Авлиёлар балодан асрайдими?

Ассалому алайкум, қори ака! Аллоҳ илмингизни зиёда қилсин! Яқинда бир ҳодиса рўй берди. Акамлар уйимиздан узоқроқ жойда таксичи бўлиб ишлайди. Бир куни аварияга учради ва машинаси деярли яроқсиз бўлиб қолди. Аллоҳ паноҳида асраган экан, акамларга ҳеч нима қилмади. Шундан кейин қариндошларим орасида гап чиқди. У ерда авлиёларни зиёрат қиладиган жой бор экан. Кўп таксилар ҳар хил бало-офатдан сақласин, деб авлиёлар жойига бориб, машина қисмларини қўяр экан. Шунда авария деган нарсалардан асраркан. Ахир бандани асрайдиган Аллоҳ-ку! Авлиёлар ўзи кимлар? Шу ҳақида ҳам маълумот берсангиз! Жавобингиз учун олдиндан раҳмат!