ТИЛИНГИЗНИ АСРАНГ!
Ибн Масъуд розияллоҳу анҳудан ривоят қилинади. Расулуллоҳ соллаллоҳу алайҳи васаллам: "Мусулмонни сўкишлик фосиқликдир" дедилар. Имом Бухорий ва Муслим ривоятлари.
Имом Ибн Ҳиббон ривоят қилган ҳадисда Ниёз ибн Ҳимор қуйидагиларни айтадилар: "Мен Пайғамбаримиз саллоллоҳу алайҳи васалламга "Эй Аллоҳнинг Расули! Бир одам мени сўкса, у ўзимдан паст бўлса, ундан ғолиб келадиган бўлсам, менга бирор нарса бўладими?" деб сўрадим. У зот: "Икки сўкишган, обрўйини тўкаётган ва ёлғон гапираётган кишилар икки шайтондир" дедилар.
Абу Бакр Сиддиқ розияллоҳу анҳу Пайғамбаримиз соллаллоху алайҳи ва сал¬лам билан бирга ўтирган пайтларида бир безори одам келиб, у кишини ҳақорат қилаверди. Бир оз сукут қилиб сўнгра ҳақоратга яраша раддия бердилар. Шунда Расули акрам соллаллоҳу алайҳи ва саллам ўринларидан туриб, бошқа жойга равона бўлдилар. Сабабини сўраганларида Абу Бакр розияллоҳу анҳуга караб: "Сизни ҳақорат қилаётган кишига сукут қилиб турганингда сизнинг ўрнингизга бир фаришта жавоб қайтариб турган эди. Раддия бера бошлаганингиздан кейин фаришта кетиб, ўрнига шайтон келди. Шунинг учун мен туриб кетдим", деган эдилар.
Аллоҳ таоло ўз бандаларининг айбу нуқсонларини яшириб ўрталарига парда солиб туради. Мўмин одам шу парданинг йиртилишига йул қўймаслиги лозим. Ҳадиси шарифда айтилади: "Икки мусулмон ўртасидаги Аллоҳ қўйган пардани кимки ёмон сўз билан йиртса, демак, у Аллоҳнинг пардасини йиртган булади" (Имом Байҳақий ривояти).
Тилингиз жиловини қўйиб юборманг, токи у сизни ҳалокат, фиску-фужур ва азобга гирифтор қилмасин! Аллоҳнинг раҳмат ва мағфиратига шундоқ хам муҳтожмиз-ку! Ҳожатимизни солиҳ амал ва мусулмонлар ҳурматини сақлашлик би¬лан тилайлик. Шояд шунда Аллоҳ таоло бизларни Ўз раҳматига мушарраф этса, Унинг Ўзи дуо ва илтижоларни ижобат қилувчидир!
Мақсудхон Иномхонов
“Саид Насимхон Тўра” жомеъ масжиди имом ноиби
