Атиги 5 дақиқа...
Кўпинча одамларнинг “ҳаёт ташвишларига ўралиб қолдим”, “вақтим ҳеч нарсага етмаяпти” ёки “муаммолардан ортиб ибодатга вақт ажратолмаяпман” деган иддаолари қулоғимизга чалинади. Лекин, унутмайлик, Аллоҳнинг марҳамати кенг. У бизга арзимаган амалимиз учун беҳисоб савоблар ваъда қилганки, кўпчилигимиз бундай бебаҳо неъматни беҳуда сарфламоқдамиз. Келинг, барчамиз учун арзимас ҳисобланган 5 дақиқа ичида қанча савоб олиш мумкинлиги ҳақида фикр юритайлик.
1. 5 дақиқада араб тилини ўртача билувчи киши Қуръондан 1700 ҳарфни бемалол ўқийди. Маълумки, Қуръоннинг ҳар бир ўқилган ҳарфи учун 10 савоб ваъда қилинган. Демак, 5 дақиқада 17000 савоб олиш мумкин. Агар киши секин-аста, тўхтаб ўқиса ҳам саҳиҳ ҳадисларда ёзилишича, Қуръонни қийналсада ўқишга ҳаракат қилган кишининг савоби 2 баробар кўпайтирилади. Демак ўртача ҳисобда бундай инсон 8500 савобга эришади.
2. 5 дақиқада 50 марта “Ла илаҳа иллаллоҳу, ваҳдаҳу ла шарика лаҳ-лаҳул мулку ва лаҳул ҳамд, ва ҳува аъла кулли шайъин қодийр”
(Аллоҳдан ўзга Илоҳ йўқ, у Ягона, унинг шериги йўқ. У барча мулк Эгасидир ва Угина ҳамдга лойиқ. У барча нарсага қодир)
калимасини такрорлаш мумкин.
Саҳиҳ ҳадисларда келтирилишича, кимда-ким ушбу калимани 10 марта такрорласа, унинг 10 та гуноҳи ўчирилади ва 10 савоб ёзилади. Шунингдек, унинг даражаси (Жаннатда) 10 тага кўтарилади ва у икки қулни озод қилган савобини олади.
3. 5 дақиқада 200 марта Калимаи Шаҳодатни такрорлаш мумкин.
“Ла Илаҳа Иллаллоҳ” (Аллоҳдан ўзга илоҳ йўқ)
4. 5 дақиқада 320 марта Аллоҳга ҳамд айтиш мумкин.
Алҳамдулиллаҳ (Аллоҳга ҳамд бўлсин)
5. Расулуллоҳ саллоллоҳу алайҳи васаллам айтадилар: “энг яхши зикр бу “Ла Илаҳа Иллаллоҳ”, энг яхши дуо “Алҳамдулиллаҳ”дир”. (Ибн Можжа ва Термизий ривояти)
6. 5 дақиқада 75 марта “Субҳаналлоҳ валҳамдуллилаҳ, ва ла илаҳа иллалоҳ валлоҳу акбар” калимасини такрорлаш мумкин.
Расулуллоҳ саллоллоҳу алайҳи васаллам айтадилар: “ушбу калиманинг ҳар бир сўзи “субҳаналлоҳ” – садақа, “алҳамдулиллаҳ” – садақа, “Аллоҳу акбар” –садақа, “ла илаҳа иллаллоҳ” садақадир”. (Муслим ривояти)
75 ни 4 га кўпайтирамиз 300. Демак, 300 садақа савобини олиш мумкин.
7. 5 дақиқада Расулуллоҳ саллоллоҳу алайҳи васалламга 100 марта саловот айтишимиз мумкин.
“Аллоҳуммаа солли ва саллим аъла набийина Муҳаммад”. Расулуллоҳ саллоллоҳу алайҳи васаллам айтадилар: “Ким менга бир саловот айтса Аллоҳ унга 10 та ажр беражак” (Муслим ривояти).
Демак, 5 дақиқада 1000 ажрга эга бўламиз.
8. 5 дақиқада 450 марта истиғфор айтишимиз мумкин.
“Астағфируллоҳ”.
Аллоҳга истиғфор айтиб тавба қилиш, кун давомида билиб, ё билмай қилаётган гуноҳларимизга каффорат бўлади Иншааллоҳ.
Қаранг, атиги 5 дақиқада қанча савоб ва ажрга эришишимиз, гуноҳлардан фориғ бўлишимиз мумкин. Лекин ана шу 5 дақиқани қўшиқ тинглаб, беҳуда гапларни гапириб ёки ўйин ўйнаб ўтказишимиз мумкин. Энди ўзингиз ўйлаб кўринг, қай бири бизнинг келажагимиз ва охиратимиз учун фойдалироқ!
Қосимхон Бойханов