ҚАДРНИ ҒАНИМАТ БИЛАЙЛИК ЁХУД БИР УМРГА ТАТИГУЛИК ТУН
Аллоҳ Ўзининг ҳикмати ила баъзи кунлар ва баъзи соатларни бошқаларидан устун ва фазилатли қилиб қўйди. Мисол учун, ойлар ичида рамазон, ҳафта ичида жума, кунлар ичида эса қадр кечаси.
Ушбу муборак соатларда Ўзининг кўрсатмасига итоат қилган бандаларига улкан ажрларни ваъда қилди. Мана шундай ажрларга қадр кечасини ибодат билан бедор ўтказган кишига тайёрлаб қўйилган савоб ҳам киради.
Аллоҳ ушбу тунни ибодат ва дуолар билан бедор ўтказган бандасига 1000 ойлик ибодатни яъни саксон уч йилу тўрт ойлик ибодатнинг савобини беришни ваъда қилди.
Шу ўринда бир савол туғилади; Нима учун айнан минг ой? Юз ой ёки икки минг ой эмас? Бу саволга жавоб бериш учун Имом Термизий раҳматуллоҳи алайҳ ривоят қилган қуйидаги ҳадисга мурожаат қиламиз.
«أَعْمَارُ أُمَّتِى مَا بَيْنَ سِتِّينَ إِلَى سَبْعِينَ وَأَقَلُّهُمْ مَنْ يَجُوزُ ذَلِكَ».
«Умматимнинг умри 60 ва 70 ёшнинг орасида бўлади. Уларнинг озчилиги бу ёшдан ўтади», дедилар.
Агар минг ойни 83 йилу 4 ойлигини инобатга олсак, унда қуйидаги маъно келиб чиқади:
Қадр кечаси битта инсонинг умридан ҳам кўра афзалроқдир, деган маъно тушунилади.
Гўёки Аллоҳ шундай деятган бўлади:
مَنْ قَامَ لَيْلَةَ الْقَدْرِ كَأنَّمَا قَامَ الْعُمْرَ كُلَّهُ
«Ким қадр кечасини ибодат билан бедор ўтказса, гўёки бутун умрини ибодат билан ўтказганнниг ажрини олади».
Азизлар агар ҳисоблаб чиқсак қуёш ботгандан кейин яъни тунги соат саккиздан фажр вақтигача яъни 3:30 дақиқа ўтганча етти ярим соат вақт бўлар экан. Мана шу етти ярим соат бир кишига бериладиган 70-80 йиллик умрдан кўра афзал экан.
Шунниг учун Пайғамбаримиз соллаллоҳу алайҳи васаллам бу тундан ғафлатда қолган инсонни ҳамма яхшиликлардан маҳрум бўлагинин айтиб шундай деганлар:
هَذَا الشَّهْرَ قَدْ حَضَرَكُمْ وَفِيهِ لَيْلَةٌ خَيْرٌ مِنْ أَلْفِ شَهْرٍ مَنْ حُرِمَهَا فَقَدْ حُرِمَ الْخَيْرَ كُلَّهُ
«Мана сизларга бу ой кирди. Бу ойда шундай бир тун борки, у тун минг ойдан афзал. Ким бу тундан маҳрум бўлса, барча яхшиликлардан маҳрум бўлибди».
Қадр кечасида қодир бўлганча намоз ўқилади. Зикр қилинади. Қуръон тиловат қилинади. Ва энг муҳими оламлар Роббига юзланиб дуо қилинади. Чунки бу соатларда Аллоҳ бандаларига юзланиб:
هَلْ مِنْ سَائِلٍ يُعْطَى هَلْ مِنْ دَاعٍ يُسْتَجَابُ لَهُ هَلْ مِنْ مُسْتَغْفِرٍ يُغْفَرُ لَهُ
«Сўровчи борми? Берилади. Дуо қилувчи борми? Ижобат қилинади. Тавба қилувчи борми? кечирилади», деятган бўлади.
Келинг азиз юртдошлар бу соатни ғанимат билиб, тоат ва ибодатлар билан бедор ўтказайлик!
Одилхон қори Юнусхон ўғли
