Бугун бахтлисан!
Имон – қайғу-ғамларни кетказувчи, имон – Аллоҳни ёлғиз дегувчиларнинг шодлиги, обидларнинг тасаллисидир. Ўтган нарса ўтиб кетди, ўтмиш ниҳоясига етди, у ҳақида ўйлама. Битилган қазои қадарга, тақсимланган ризқ-рўзга рози бўл, хавотирни тарк эт. Огоҳ бўл! Аллоҳни зикр қилиш билан қалблар ором олади, гуноҳлар камаяди. Ғайбларни билувчи Зот рози бўлса, ғам-қайғулар чекинади.
Бировдан раҳмат кутма, барча ҳожатлар Ундан сўралади. Ҳеч кимга муҳтож бўлмаган мангу тирик Зотнинг савоби сенга кифоя. Тонг отгач, тунни кутма, бугунинг учун яшаб, бугунинг учун ғам чек, эртанг учун ғам чекма. Чунки бугуннинг ислоҳи эртанинг ислоҳидир. Қалбингни ҳасад-адоватдан пок тут, қалбингдан нафрат, жирканишни чиқариб ташла. Ўзингни яхши одамларга яқин тут. Уйингдаги ишларга машғул бўл, одамларга камроқ аралаш.
Китоб энг яхши дўст, китоблар билан ҳамсуҳбат бўл. Илмни дўст тут, маърифатга ҳамроҳ бўл. Коинот тартиб-интизомдан иборат. Уй-жой, кийим-кечак билан боғлиқ мажбуриятларингда тартибга риоя қил. Бадантарбия билан шуғуллан, дангасалик, мақсадсиз ҳаёт кечиришдан узоқ бўл ҳамда бекорчилик, ишсизликка нуқта йўқ.
Тарихни ўқи, ундаги ҳодисалар ҳақида фикр юрит, хулоса қил. Ҳаётингни янгила, яшаш услубларини ўзгартир, хурофий одатлардан воз кеч. Бадбинлик, омадсизлик ва маъюсликни тарғиб қиладиган китобларни ўқима. Парвардигорингнинг мағфират дарёси кенг эканини, бандаларини авф этиб, тавбаларини қабул қилишини, ёмонликларни яхшиликка ўзгартиришга қодир Зот эканини эсла...
Қуръон билан яша, уни ёд ол, тиловат қил, тингла, фикр эт. Чунки Қуръон барча ғам-қайғуларнинг энг яхши давосидир. Аллоҳ таолога таваккул қил, ишларни Унга топшир, Унинг ҳукмига рози бўл, Унга мурожаат қил, Унгагина ишон.
Сенга зулм қилганни кечир, сендан узилганга боғлан, эҳсон қил, золимларга ҳалим бўл, осуда ҳаёт кечирасан. Келажакка ишонч билан қара, ноумид бўлма. Аллоҳ ихтиёрида эканингдан хурсанд бўл, чунки сен ғам-алам ёки шод-хуррамликнинг қайси бири сенга фойда эканини билмайсан. Бало-офат сени Аллоҳ таолога яқинлаштиради, дуони ўргатади, сендан кибр, манманлик ва фахр туйғуларини кетказади.
Гумон-шубҳалардан, бузуқ фикр-хаёллардан узоқ бўл. Дунё ғам-андуҳ, ташвиш ва хавотир ҳовлисидир. Аллоҳ таоло сенга етган ғам-андуҳ, очлик, фақирлик, касаллик, мусибатларнинг барчасига ажр-мукофот беради. Мусибат кўзларни очиб, қалбларни уйғотади, нафсни тияди, қулликни эслатиб, савобни оширади. Фалокатни кутма, миш-мишларга ишонма, уйдирмаларга таслим бўлма...
Оиз Қаранийнинг “Маҳзун бўлма” китобидан