Musulmon yigit 17 nafar odamni olovdan qutqarib qoldi

     27 yoshlik saudiyalik Ahmad Avad Anzi (Saudiya qirolining Holid shifoxonasi qo‘riqchisi) yong‘in sodir bo‘lgan chog‘da 17 nafar insonning hayotini qutqarib qoldi, deb xabar beradi Al Arabiya.
    "Klinikada yong‘in boshlangani haqidagi xabar kelib tushgan chog‘da hamkasblar bilan birga tezda voqea joyiga yetib bordik. Bino ichi tutunga to‘lib bo‘lgandi. Sheriklarimga yong‘in o‘chirish xizmatini chaqirishlarini aytdim. Biroq qutaqaruvchilarni kutib turishga vaqt yo‘q edi. Chunki ichkarida ayollar va bolalar bor edi. Shartta ko‘ylakni yechib, og‘zimga bog‘ladim va ichkariga kirib, barcha eshiklarni ochib, odamlarni yong‘indan xabardor qilib chiqdim,”- dedi qo‘riqchi.
   Biroq bu hali hammasi emas. Barcha odamlar tashqariga olib chiqilgan chog‘da yana bir shifokor ayol o‘z xonasida qolib ketgani ma’lum bo‘ladi. Ahmad vaqtni qo‘ldan boy bermay, yong‘in bo‘layotgan binoga o‘zini uradi va ayolni o‘z xonasidan topadi. Bu paytda ayol tutundan bo‘g‘ilib, xushini yo‘qotgan edi.
    Bu yong‘inda qahramon posbonning o‘zi ham tutundan zaharlangan va shifoxonaga yotqizilgan.