Mahsi yechilsa, tahorat sinadimi? 26.02.2017
Savol:Assalomu alaykum! Maxsni yechsa tahorat sinadimi?
Bo`lim Fiqh6025
Va alaykum assalom. Mahsini yechish bilan unga tortilgan mash buziladi. Bir poyi yechiladimi yoki ikkala poyimi, farqi yo‘q.
Mug‘iyra ibn Shu’ba roziyallohu anhudan rivoyat qilinadi: “Biz Rasululloh sollallohu alayhi va sallam bilan g‘azotda qatnashdik. U zot bizni mahsiga mash tortishga buyurdilar. Agar mahsini yechmasa, musofir uch kecha-uch kunduz, muqim bir kecha-bir kunduz mash tortishi mumkinligini aytdilar” (Tabaroniy va Bayhaqiy rivoyat qilgan).
Mahsi yechilishi bilan avvalgi betahoratlik oyoqqa o‘tadi. Agar mahsi yechilganda kishining tahorati bo‘lmasa, to‘liq tahorat qilib, keyin namoz o‘qiydi. Agar mash tortish muddati tugamasdan oldin mahsi yechilganda, kishi tahoratli bo‘lsa, faqat oyog‘ini yuvadi, yangidan tahorat qilishi shart emas.
Ibrohimdan rivoyat qilinishicha, Alqama va Asvaddan, tahorat qilib, mahsiga mash torgan, keyin uni yechgan kishi haqida so‘ralganda, u ikkisi: “Oyog‘ini yuvadi”, deb javob berishgan (Doraqutniy va Bayhaqiy rivoyat qilgan).
Xullas, mahsi yechilganida kishining tahorati bo‘lmasa, yangidan tahorat qiladi. Bunda mahsiga tortilgan mash butunlay sinadi. Agar mahsisini yechgan odamning tahorati bo‘lsa, u holda oyog‘ining o‘zini yuvib olsa bo‘ldi. Vallohu a’lam!
Manba: “Tahorat kitobi”