Ko‘ngillarga bir olam surur va quvonch baxsh etgan Ramazoni sharifning so‘nggi kunidagi Iydi Ramazon hayiti barchamiz uchun orziqib kutilgan bayram. Buni bugun erta tongdan muborak Hayit namoziga oshiqqan minglab mo‘min yurtdoshlarimiz nigohida ko‘rish mumkin edi.

   Yurtimizning barcha joylarida bo‘lgani kabi poytaxtimizdagi Shayx Zayniddin jome masjidi ham uzoq-yaqindan kelgan namozxonlar bilan to‘la bo‘ldi. Hayit namozi  avvalida Shayxontohur tumani bosh imom-xatibi, Shayx Zayniddin jome masjidi imom-xatibi Odilxon qori Yunusxon o‘g‘li qutlug‘ bayramning fayzu barakoti, yurtimizdagi e’tiqod erkinligi va milliy qadryatlariga berilayotgan e’tibor, eng bebaho ne’mat sanalmish tinchlik va osoyishtalikning qadri va fazli xususida amru ma’ruf qildi.

   Shundan so‘ng Ramazon hayiti namozi ado etildi. Masjidga yig‘ilgan mo‘minlar jamoasi duoga qo‘l ochib, bugungi nurafshon va osoyishta kunlar uchun shukronalik bildirdi, aziz Ona yurtimiz va qalbi e’zgulikka to‘la xalqimiz haqqiga duoi xayrlar qilindi.

     Namozdan so‘ng, barcha yurtdoshlarimiz qutlug‘ bayram bilan bir-birlarini muborakbod etishdi. Ayyom muborak bo‘lsin, azizlar!