Pokiston Islom Respublikasi prezidenti Mamnun Huseyn “Hazrati Imom” majmuasiga tashrif buyurdi
Pokiston Islom Respublikasi prezidenti Shanxay Hamkorlik Tashkiloti davlat rahbarlari kengashining navbatdagi majlisida ishtirok etish uchun 22 iyun kuni O‘zbekistonga tashrif buyurdi.
Bugun oliy martabali mehmon Prezidentimiz tashabbusi bilan bunyod etilgan “Hazrati Imom” majmuasini ziyorat qildi. Pokiston prezidentiga buyuk ajdodlarimizning boy ma’naviy merosi, uni o‘rganish va keng targ‘ib etish borasida amalga oshirilayotgan ishlar, “Mo‘yi Muborak” va “Baroqxon” madrasalari tarixi, mustaqillik yillarida ushbu maskanda amalga oshirilgan beqiyos bunyodkorlik va obodonlashtirish ishlari haqida so‘zlab berildi.
Sharq me’morligining noyob an’analarini o‘zida mujassam etgan “Hazrati Imom” majmuasi mehmonlarda katta taassurot qoldirdi. Mamnun Huseyn muhtaram yurtboshimiz rahnamoligida mamlakatimizda buyuk ajdodlarimiz merosini o‘rganish va keng targ‘ib qilish, ular nomi bilan bog‘liq maskanlarni obod etish borasida amalga oshirilayotgan ishlarga yuksak baho berdi.
Shuningdek, “Baroqxon” madrasasida joylashgan milliy hunarmandchilik buyumlari namoyishi ham Pokiston prezidentida katta taassurot qoldirdi.