“O‘smat ota” jome masjidi binosiga birinchi g‘isht qo‘yildi
Toshkent viloyatidagi “O‘smat ota” jome masjid qurilishi ishlari boshlandi. Ushbu masjidning tayyorlangan loyihasiga ko‘ra, kishilar uchun juda qulay va shinam bo‘lishiga alohida e’tibor qaratilgan. Allohga shukrki, yurtimizdagi ikki mingdan ziyod masjidlarimiz kundan-kunga obod bo‘lmoqda. Ko‘p masjidlar zamonaviy shaklda ta’mirlanib, chiroyli va qulay holatga keltirilmoqda.
Bunday ezgu ishga hissa qo‘shish istagidagi quruvchilar o‘z mahoratlarini ko‘rsatib, bor kuch-g‘ayrat bilan mehnat qilishmoqda. Zero, masjidni obod etishning savobi ulug‘ ekani Islom manbalarida bayon qilingan. Bu haqda Anas ibn Molik (roziyallohu anhu)dan bunday rivoyat qilingan: “Kim masjidda bitta chiroq yoqsa, o‘sha chiroqning nuri o‘chgunicha farishtalar u kishining haqqiga istig‘for aytib turadilar”.
Ushbu xayrli tadbirda ishtirok etgan O‘zbekiston musulmonlari idorasi raisi, muftiy Usmonxon Alimov boshchiligida taniqli ulamolar hamda nuroniy otaxonlar masjidning birinchi g‘ishtini qo‘yib berdilar.
Piskent tumanida joylashgan “O‘smat ota” jome masjidining yangi binosi uzunligi 24 metr, eni 12 metrni tashkil etib, bir vaqtni o‘zida uch yuzdan ziyod namozxonlarni sig‘dira oladi. Toshkent viloyatining chekka huddida qad rostlaydigan ushbu jome masjid, xalqimiz uchun juda katta tuhfa bo‘ladi, inshoalloh.