"Minor" jome masjidiga muftiy hazratlari tashrif buyurdilar
Bugunda Toshkent shahrining ko‘rkiga aylangan "Minor" jome masjidi o‘ziga xos savlati, pokiza viqori ila ezgu e’tiqod sohiblarini o‘z bag‘riga chorlab turibdi. Muhtaram yurtobishimiz ushbu masjidga tashrif buyurganlarida:
“Avvalo bunday ibodat uylari xalqimiz uchun. Mard va jasur, turli og‘ir zamonlarda matonat va chidamlik ko‘rsatgan xalqimiz uchun! Nima uchun O‘zbekistonimizning madaniyati bu qadar qadimiy degan savol berilsa, avvalo dinimiz, tufayli. Muqaddas islom dinimiz bo‘lmaganida biz bu qadar madaniyatga ega bo‘lmas edik, deya javob bergan bo‘lar edim”, deya ta’kidlagan edilar.
Yurtimizning, qolaversa jahonning turli nuqtalaridan tashrif buyuruvchi ziyoratchilar, sayyohlar bilan gavjum bo‘lguvchi ushbu nurli maskan Ramazon oyida muazzam ibodatgohlardan biriga aylangan.
Mohi Ramazonning 17-kuni, 21-iyun sanasida mazkur jome masjidga Taroveh namoziga O‘zbekiston musulmonlari idorasi raisi, muftiy hazratlari tashrif buyurdilar. Muftiy hazratlari jomeda Xatmi Qur’onni ado etib berayotgan hofizi Qur’onlarga katta minnatdorchilik izhor etdilar. Shuningdek, yurtimizdagi osoyishtalik, obodlik sabab shunday Ramazon kechalarida jam bo‘lib, ilohiy rahmatdan bahramand bo‘lish baxtiga muyassar bo‘layotganligimizni aytib o‘tdilar. Suhbat asnosi payg‘ambarlar tarixidan ibrat mavzusida kechdi.