“Haj-2016” guruh rahbarlarining yig‘ilishi bo‘lib o‘tdi
Joriy yilning 1 avgust kuni Toshkentdagi “Shayx Zayniddin” jome masjidida “Haj-2016” mavsumida Qoraqalpog‘iston Respublikasi, Toshkent shahri va Sirdaryo, Jizzax, Xorazm, Toshkent viloyatlari ziyoratchilariga xizmat ko‘rsatuvchi guruh rahbarlari uchun yig‘ilish bo‘lib o‘tdi. Unda Din ishlari bo‘yicha qo‘mita mas’ul xodimlari M.Yo‘ldoshev, D.Babadjanov, O‘MI Matbuot kotibi J.Nuriddinov, O‘MI Xalqaro aloqalar bo‘limi mudiri M-A.Shakirov, tibbiyot guruhi xodimlari va guruh rahbarlari ishtirok etishdi.
Tadbirda guruh rahbarlari tomonidan rioya etiladigan qonun-qoidalar, ularning burch va mas’uliyatlari, haj ibodati ruknlari, safarga jo‘nab ketish hamda Saudiya Arabistonidagi tashkiliy ishlarning guruh rahbarlariga taalluqli bo‘lgan jihatlari atroflicha yoritildi.
Shuningdek, safarga doir hujjat ishlarida nimalarga e’tibor qaratish lozimligi va guruhdagi ziyoratchilar bilan ishlash davomida ularning pasport va boshqa hujjatlarini yuritish qoidalari borasida ham guruh rahbarlariga ma’lumot berildi.
Tibbiyot guruhi xodimi ziyoratchilar sog‘lig‘ini muhofaza qilish borasida guruh rahbarlariga zarur tibbiy tavsiyalar berdi.
Tadbir yakunida mutasaddilar guruh rahbarlari tomonidan berilgan barcha savollarga batafsil javob berdilar.
