Terrorchilarga qarshi Moskva konferensiyasi bo‘lib o‘tdi
Joriy yilning 14 iyul kuni Moskva shahrida “Internet orqali faoliyat olib borayotgan terrorchi guruhlarning faoliyatini cheklash borasida amaliy chora-tadbirlar” nomli konferensiya bo‘lib o‘tdi. Unda Moskva bosh muftiysi Albir Krganov o‘z ma’ruzasi bilan ishtirok etdi. U, o‘z nutqida internetda foliyat olib borayotgan buzg‘unchi guruhlar va ularning faoliyatlari haqida to‘xtalar ekan, bu kabi tahdidlarni ma’naviy tahdidlar sifatida baholadi. Hamda ular yoshlarni qanday yo‘llar va usullar bilan o‘z tuzog‘iga ilintirayotgani haqida alohida to‘xtaldi.
Shuningdek, muftiy suhbat davomida: “Bizning dushmanlarimiz juda mohir, aqlli va boy bo‘lib, ular faoliyat uslublarini va yo‘nalishlarini doimiy ravishta, tez-tez o‘zgartirib turadilar. Ularning asosiy quroli – islomda daqiqlik bilan yondashiladigan atamalar va belgilardan ustalik bilan foydalanishdir”, deb ta’kidlab o‘tdi.
Konferensiya yakunida, muftiy Albir Krganov terrorizmga qarshi kurashda faollik ko‘rsatayotgan diniy soha xodimlari va yoshlarni to‘g‘ri yo‘ldan adashtirishga urinayotgan har qanday kuchlarga qarshi faoliyat olib borayotgan barcha mutasaddi tashkilot faollariga minnatdorchilik bildirdi.
