G‘ayridin vakillari Ro‘za tutishdi
Muborak Ramazon oyida ayrim boshqa din vakillari ham ro‘za tutib, ro‘zadorlarning holatini his qilishni va ularda qanday o‘zgarishlar yuz berishini istadilar. Jumladan, Birlashgan Arab Amirliklarida istiqomat qiluvchi Germaniya fuqarosi Sonya Nyuber ham ro‘za tutib ko‘rdi. U har kuni sahar turib xurmo, soyali sut, qahva va boshqa yeguliklar bilan saharlik qilar va kun davomida hech narsa iste’mol qilmasdi. U ro‘zani musulmonlarga bo‘lgan hurmati va islom madaniyatiga bo‘lgan mehri tufayli tutganini ma’lum qildi. Uning: “Men Ramazon oyida ro‘za tutishni o‘tgan yili niyat qilgan edim, shu tufayli o‘zimda ko‘nikma hosil qilish uchun qish mavsumida, kunlar qisqa bo‘lgan paytda ro‘za tutishga harakat qildim va buni epladim. Keyinchalik faqat dushanba kunlari, undan so‘ng esa, dushanba va payshanba kunlari ro‘za tuta boshladim. E’tiborli jihati shundaki, men odatiy ish kunida, atrofimdagi insonlar yeb-ichib yurgan paytda ham bemalol ro‘za tutdim”, - degan so‘zi ko‘pchilikni e’tiborini tortdi.
Shuningdek, Buyuk Britaniyalik talaba Deyl ham Ramazon ro‘zasini tutdi. Bu borada u quyidagi fikrlarni bildirdi: “Inson baxtli ekanini his qilish uchun, bir oy davomida kun bo‘yi yeb-ichishdan voz kechish kerakligini bildim. Ro‘za tutish juda ham ajoyib”.
