Qo‘rqish gunohmi? 20.05.2017
Savol:
Assalomu alaykum! Bir do‘stimdan eshitib qoldim: qo‘rqish gunoh, faqat Allohdan qo‘rqish kerak. Boshqa holatdagi qo‘rqish gunoh ekan. Shu gap to‘g‘rimi?
5530
Va alaykum assalom. Alloh taolo Qur’onda faqat O‘zidan qo‘rqishga, taqvo qilishga chaqirgan. Allohdan qo‘rqish, U Zot ulug‘ligini e’tirof etish, aytganlarini qilish, qaytarganlaridan qaytish, Allohning g‘azabiga uchrashdan saqlanish bilan bo‘ladi. Bu borada Allohga hech narsa sherik qilinmaydi. Zero, “shu odam xohlasa, menga zarar yetkazadi, azob-uqubatga soladi”, deb o‘ylash to‘g‘ri emas.
Ma’lumki, har bir insonda tabiiy qo‘rquv hisi mavjud. Masalan, qorong‘ilikdan, yuqoriga chiqishdan, yirtqich hayvondan, suvga cho‘kish yoki tabiiy ofatlar qurboni bo‘lishdan qo‘rqish har bir odamning fitratida bor narsa. Bu – uning tabiatiga xos xislat. Buning uchun hech kim malomat qilinmaydi. Chunki, tabiiy qo‘rquv odamning o‘ziga bog‘liq bo‘lmagan holda yuz beradi. Chunonchi, tabiiy qo‘rquv bilan Allohdan qo‘rqish o‘rtasida farq bor. Vallohu a’lam!