Ummul Kirom Karima bint Ahmad ibn Muhammad Marvaziya faqiyha, olima va hadis ilmi bilimdonidir. Yuz yil yashadi va bokira holda vafot etdi.
Islom dini va shar’iy ilmlar xizmatida katta o‘rin tutgani uchun tarixchi olimlar olimaga «Ummul Kirom» laqabini berishgan.
Karima Makkadagi Masjidul Haromga qo‘shni bo‘lgan va ilm talabida otasi bilan birga ko‘p o‘lkalarga safar qilgan. Umrini ilm yodlab, rivoyat qilib, o‘rganib, ko‘pchilikka o‘rgatib o‘tkazdi. Olimaning o‘sha davrda ko‘plab shogirdlari yirik faqih bo‘lib yetishdilar.
Zamondoshlari Karimani fahmi o‘tkir, ziyrak muhaddisa va fozila deya sifatlaganlar.
Sahihul Buxoriyning eng oliy sanadlari Karimaga yetib boradi. Zero, Karima Sahihul Buxoriyni rivoyat qilish va uni boshqalarga o‘qib eshittirish bilan mashhur bo‘lgan. Natijada Karimaning ismi Sahihul Buxoriy nomi bilan bog‘langan. Qaysi olim Karimaning tarjimai holini yozsa, uning Sahihul Buxoriyga aloqadorligiga ishora qilib o‘tadi.
Olima haqida Imom Zahabiy quyidagilarni aytgan: «Karima shayxa, olima, fozila, ishonchli sanad vakilasidir. Ummul Kirom Karima bint Ahmad ibn Muhammad Marvaziya Allohning Haramiga qo‘shni bo‘lgan... Sahihni ko‘p marta rivoyat qilgan... Aslo turmushga chiqmagan va bokira holda vafot etgan».
Karima fiqh ilmlarini yirik fuqaholar va ulamolardan olgan. Masalan, Zohir ibn Ahmad Saraxsiy, Abdulloh ibn Yusuf Asbahoniy va boshqalar.
Karima Marvaziya 463 hijriy yilda vafot etgan. Alloh taolo olimani rahmatiga olgan bo‘lsin!