Joriy yilning 24 noyabr kuni Rossiya Federatsiyasining Sverdlovsk viloyati musulmonlari idorasi markaziy muftiyoti rahbari, muftiy Abdul-Qudduss Asharin taklifiga binoan o‘zbekistonlik imomlaridan iborat delegatsiya Rossiyaning Yekaterinburg shahriga jo‘nab ketishdi. 
   Mazkur delegatsiya tarkibida Toshkent shahar Shayxontohur tumani bosh imom-xatibi, “Shayx Zayniddin” jome masjidi imom-xatibi Odilxon Ismoilov ham bor. Shuningdek, unda O‘zbekiston Musulmonlari idora raisi o‘rinbosari Ibrohim Inomov, diniy idoraning Samarqand viloyatidagi vakili o‘rinbosari, “Imom Buxoriy” jome masjidi imom-xatibi Zayniddin Eshonqulov va “Do‘stjonboy ota” jome masjidi imom-xatibi Bahrom Otajonovlar ham bor. 
   Imomlar safar doirasida Rossiyaning Sverdlovsk viloyati hududida joylashgan masjidlarda namozxonlar bilan belgilangan suhbatlar, madaniy markazlardagi muloqotlar hamda Ural davlat tog‘-kon universitetining o‘qituvchi va talabalari bilan uchrashuvlarda ishtirok etishadi. 
    Safar tafsilotlarini saytimizda kuzatib boring. 

Shayx Zayniddin jome masjidi matubot xizmati