Шайх Зайниддин жоме масжидида умумхалқ хайрия ҳашари бўлиб ўтди

12 Mart 2017 598

   Озодалик, поклик ва ҳамжиҳатлик халқимиз қонига сингган азалий қадрият, гўзал анъаналардан бири. Муқаддас ва муборак динимизда ҳам поклик бирламчи масала саналади. Ҳашар баҳона одамлар орасида оқибат ришталари боғланади, чор-атроф тартибга келтирилади.

   Ўзбекистон Республикаси Вазирлар Маҳкамасининг 2017 йил 2 мартдаги фармойиши асосида мамлакатимизда март-апрель ойлари ободонлаштириш ва кўкаламзорлаштириш ойлиги, деб эълон қилинди. Ойлик доирасида 11-12 март кунлари Республикамизнинг барча жойларида умумхалқ хайрия ҳашари ўтказилиши белгиланди.

   Барча жойларда бўлгани каби Тошкент шаҳар, Шайхонтоҳур тумани, Шайх Зайниддин жоме масжидида ҳам мазкур озодалик тадбири уюшқоқлик билан ўтказилди. Унда Шайх Зайниддин жоме масжидида имом-хатиби Одилхон Исмоилов бошчилигидаги жамоа фаол қатнашди.

   Тадбир доирасида масжид ва қабристон ҳудуди тартибга келтирилди, ариқлар, кўчалар ва йўлаклар тозаланди, дов-дарахтларни оқлаш ва буташ ишлари амалга оширилди. Шунингдек, ижтимоий ҳимояга муҳтож, ногирон, кам таъминланган, боқувчисини йўқотган оилаларининг уй-жой шароитларини яхшилашга кўмаклашилди.


Шайх Зайниддин жоме масжиди Матбуот хизмати