Dam soldirish hukmi qanday? 15.07.2017
Savol:Assalomu alaykum. Domlaga borib, o‘zini o‘qitish kabi ishlarga shariatimizda qanday qaraladi? Bu shirk hisoblanmaydimi?
Bo`lim Ijtimoiy masalalar10221
Va alaykum assalom. Shariatimizda dam soldirish joiz. Faqat bu shariat belgilab bergan chegarada bo‘lishi kerak. Ya’ni, Qur’oni karim oyatlari va sahih hadislar lafzlari bilan arab tilida dam solish, solinayotgan dam faqat Alloh izni bilangina bandaga foyda keltiradi, degan e’tiqodda bo‘lish kabi shartlar mavjud.
Arabchani to‘g‘ri o‘qiy oladigan, ilmli, yetarli tajribaga ega mo‘min banda dam solishi mumkin. Dam soldirish uchun domlaga – masjid imomiga borish shart emas. Ammo, kishining o‘zi arabchani bilmasa, Qur’on o‘qiy olmasa, ishonchli, bid’at-xurofotlardan uzoq, ilm va taqvo yo‘lini tutgan imom yoki boshqa olimlarga dam soldirish joiz. Shuni unutmaylik, mo‘min-musulmon banda uchun jinlar bilan hamkorlik qiluvchi folbin va arroflar huzuriga borish qat’iyan mumkin emas. Afsuski, mana shunday ko‘zbo‘yamachilar huzuriga dam soldirishga boruvchilar kam emas oramizda. Dam shariatga muvofiq holda solinmasa, oraga bid’at-xurofot va shirk amallar qo‘shilsa, buning zarari katta bo‘ladi. Shu sabab dam soldirish masalasida o‘ta ehtiyotkor bo‘lish lozim.