Ва алайкум ассалом ва раҳматуллоҳи ва баракотуҳ. Аллоҳ таоло кўзингизнинг нурини тикласин! Узоқ умр, сиҳат - саломатлик ва икки дунё саодатини насиб этсин! Жума намозида қатнашиш кимлар учун вожиб (яъни фарз) кимларга вожиб эмаслиги ҳақида фиқҳий китобларимизда келтирилган сўзларга кўра Имом Абу Ҳанифа раҳматуллоҳи алайҳ наздида кўзи ожиз одамдан Жума намозига бориш соқит бўлади. Аммо, Имом Абу Юсуф ва Имом Муҳаммад Шайбонийга кўра агар кўзи ожиз одамнинг етаклаб олиб борувчи ҳамроҳи бўлса, жумага қатнашиши лозим.

     Абу Ҳанифа раҳимаҳуллоҳнинг кўзи ожиз кишига жумада қатнашиш вожиб эмас, деган сўзларидан ундай одамнинг жумага бориши мутлақо мумкин эмас, деган маъно чиқмайди. Балки, бундай кишилар жума намозига бормасдан уйида пешинни ўқиса ҳам бўлаверади, гуноҳкор бўлиб қолмайди, деган маъно тушунилади. Аммо, бирор инсон қарамоғида ёки ҳамроҳлигида масжидга борса, гуноҳкор бўлмайди. Билъакс, қўшимча савобга эга бўлади.  Сизнинг ҳолатингиз эса тўлақонли кўзи ожизлик ҳисобланмайди. Шунга кўра агар бошқа узрли ҳолатлар бўлмаса, масалан касаллик, мусофирлик, йўлнинг машаққатлилиги, номуносиб об - ҳаво ва ҳоказо каби жумага боришни қийнлаштириб қўядиган ҳолатлар бўлмаса, бирор инсон ҳамроҳлигида Жума намозига боришингиз фойдадан холи эмас. Валлоҳу аълам!