25 йилда дунёни кўрган йигит
Бир кекса киши ўзининг 25 ёшли ўғли билан поездда кетаётган эди. Дераза ёнида ўтирган ўғилнинг юзида шодлик, ҳурсандчилик барқ уриб турарди. У қўлини деразадан ташқарига чиқарди ва қўлига урилаётган ҳавони ҳис қилиб: “Отажон, қаранг, ҳамма дарахтлар орқа тарафга қараб юряпти” деб қичқирди. Кекса ота ўғлининг ҳурсандчилигига шерик бўлиб, табассум қилиб қўйди.
Улар ўтирган хонада улар билан бирга эр-хотин ҳам кетаётган бўлиб, ота ва ўғил ўртасидаги суҳбатни тинглаб боришарди. Улар “Нега 25 ёшли йигит гўдакларга хос хатти-ҳаракат қиляпти?” деб асаблари таранглашиб, ҳайрон бўлаётган эдилар.
Тўсатдан йигит: “Отажон, анави адирларни, у ердаги ҳайвонларни қаранг! Булутларга қаранг, поезд билан бирга сузишмоқда” деб қичқирди. Кап-катта йигитнинг гапираётган гапларидан эр-хотиннинг баттар энсаси қотаётган, таажжуби тобора ортаётган эди.
Кейин ёмғир ёға бошлади ва йигитнинг қўлларига ёмғир томчилари келиб урилди. Бундан йигитнинг юзлари янада ёришиб, шодлиги зиёда бўлди. Шу пайт йигит: “Отажон, қаранг, ёмғир ёғяпти. Ёмғир томчилари юзимни “силаяпти”. Қаранг, отажон, қаранг!” деб қичқирди.
Бу сафар эр-хотин йигитнинг қилиқларига тоқат қилиб туролмай, кекса отасидан: “Нега ўғлингизни табибга олиб бориб, уни даволатишга ҳаракат қилмайсиз?” деб сўрашди. Шунда кекса ота: “Биз шифохонадан келяпмиз. Ўғлимнинг кўзлари очилиб, умрида биринчи марта дунёни кўра бошлади” деб жавоб берди.
Интернет маълумотларидан Нозимжон Ҳошимжон таржимаси
