Va alaykumus salom. Islom dini biz mo‘min-musulmon bandalarni har bir tirik jonga rahm-shafqatli bo‘lishga undaydi. Hatto chumoliga ham ozor berishdan qaytaradi. Shunday ekan, yaratilgan jonzotlar ichida eng sharaflisi bo‘lgan inson zotiga ikki karra ko‘proq hurmat ila munosabatda bo‘linadi. Insoniyatning eng yaxshi vakillari bo‘lmish musulmonlar boshqa e’tiqoddagilarga nisbatan yaxshi muomalaga munosibdirlar. Musulmonlar ichida yaqin qarindoshlar, qo‘ni-qo‘shnilarga o‘zgalardan ko‘ra ko‘proq muruvvat ko‘rsatiladi. Ota-ona esa inson bolasi yaxshilik qilishi kerak bo‘lgan eng muhtaram zotlardir. Ota-ona qaysi dinda, qanday martaba va yoshda bo‘lishlaridan qat’i nazar, ularning ko‘ngillarini og‘ritmaslik shart.
     Ona ilgari farzandlariga mehrsiz bo‘lgani, ularni yaxshi tarbiyalay olmagani bu boshqa masala. Onaning ba’zi xatolari sabab unga yaxshilik qilish vazifasi farzand gardanidan soqit bo‘lmaydi. Balki farzand uni dunyoga keltirib, boqib katta qilgan onasini e’zozlashi lozim bo‘ladi. “Onam menga mehr bermagan”, “yoshligimda tashlab ketgan”, “otamga hurmatsizlik qiladi” kabi bahonalar ketmaydi. Zero, farzand harchand urinmasin, onasining homiladorlik vaqtida, qolaversa to‘lg‘oq tutganda chekkan bir lahzalik og‘rig‘ining haqini ham ado etolmaydi.
    Siz aytayotgan singlimizga shuni ta’kidlaymizki, ota-onangiz o‘rtasidagi masalaga aralashmaganingiz ma’qul. Sababi otangiz gapirishi mumkin bo‘lgan gaplarni onangizga aytishga haqli emassiz. Otangiz o‘z ayoliga boshliq. Siz esa ular uchun farzandsiz, aytlarini qilishingiz kerak. Shunday ekan, ota-onangiz o‘rtasida ba’zi tushunmovchilik va hurmatsizlik sabab onangizni yomon ko‘rishingiz noto‘g‘ri. Bu ishingiz shariat ko‘rsatmalariga teskari! Unutmaylik, Rasuli akram sollallohu alayhi va sallam Asmo binti Abu Bakr roziyallohu anhoni kofir onasiga rahm-shafqat ko‘rsatishga, unga yaxshi muomalada bo‘lishga buyurganlar.