Канада полициясида муслима аёллар учун ҳижоб формаси жорий қилинди
Канаданинг Оттава шаҳридаги Thawrih корхонаси суриялик қочоқ аёлларни ишга таклиф қилиб, уларга турли касб эгалари учун муслималарга хос либослар яратиш таклифини берди. Маълумки, Thawrih бренди остида бамбук ва бошқа тез қурийдиган матолардан спорт услубидаги ҳижоб ва бош кийимлар ишлаб чиқарилади. Яқинда мазкур корхона шаҳар полиция идорасидан таклиф олган эди.
Канада полицияси ўтган йили хизматдаги муслима аёлларнинг хизмат вақтида рўмол ўрашларига қўйилган тақиқни бекор қилган эди.
«Оттава полиция идораси бизга муслималарга хос либосни полиция униформасига мослаб ишлаб чиқаришни таклиф қилишди», – дейди форма дизайнерларидан бири Сара Абуд.
Корхона дизайнерлари спорт матосидан осон ечиладиган, хавфли вазиятларда бўғилишдан сақлашга мўлжалланган чўзилувчан аёллар бош кийимини ишлаб чиқди. Ушбу вариант полиция хизмати учун айни муддао, дея таъкидламоқда ижодкорлар.