Иорданияда экстремизм ва терроризмга қарши курашишга бағишланган анжуман бўлиб ўтмоқда
Жорий йилнинг 18 август куни Иордания Ҳошимийлар қироллиги пойтахти Аммон шаҳрида “Экстремизм ва терроризмга қарши курашиш борасида ўзаро иттифоқликнинг аҳамияти” мавзусини ўрганиш бўйича фаолият юритувчи марказларнинг II анжумани ўз ишини бошлади деб хабар бермоқда www.muslim.uz
Ушбу анжуманда, Саудия Арабистони Подшоҳлиги, Иордания, Ливан, Уммон султонлиги, Бирлашган Араб Амирликлари, Миср Араб Республикаси, Жазоир Халқ Демократик Республикаси, Америка Қўшма Штатлари, Янги Зеландия, Буюк Британия ва НАТО ташкилоти вакиллари иштирок этишмоқда.
Анжуманни ўтказишдан кўзланган асосий мақсад, диний экстремизм ва терроризмга қарши курашга тааллуқли масалаларда тажриба алмашишдир.
Уч кун давом этадиган мазкур анжуманда экстремизм ва терроризмга қарши курашишнинг стратегик йўналишлари ҳамда йиғилишда иштирок этаётган давлатларнинг ушбу соҳада амалга оширган бир қатор тажрибаларига оид масалалар муҳокама этилади.
