Германия президенти: "Менинг ўрнимни мусулмон одам эгаллаши мумкин"
Германиянинг кейинги президенти мусулмон одам бўлиши мумкин. Бу ҳақида ГФРнинг амалдаги президенти Йоахим Гаук Bild нашрига берган интервьюсида маълум қилган. Унинг бу фикри мамлакатдаги ва европалик сиёсатчилар орасида кенг муҳокама қилинаяпти. Масалан, Германия социал-демократик партияси раҳбари Томас Опперман бу борада диний ва миллий мансублик муҳим аҳамиятга эга эмаслигини таъкидлаган. «Муҳими, бу ерда Конституция бош асос», - дейди интервьюларнинг бирида.
“Яшиллар” партияси бошлиғи Жем Оздемир эса “Асосийси, у яхши давлат бошлиғи бўлсин, дин иккинчи даражали”, деб фикр билдирган.
Қайд этиш керакки, Германия Конституциясига кўра, мамлакатнинг 40 ёшдан ошган барча фуқароси миллати, ирқи ва эътиқодидан қатъий назар, президентлик лавозимига ўз номзодини қўйишга ҳақли.
