Энтони Жошуа масжидда мусулмон дўстидан дуо қилишини сўраган
Супер оғир вазндаги жаҳон чемпиони Энтони Жошуанинг интернет тармоқларида тарқаган сурати кенг муҳокама қилинмоқда. Суратда боксчининг масжид ичидаги ҳолат акс этганди. Twitter саҳифасига юклаган мазкур суратга “Омад, меҳнатсеварлик ва истеъдод... Буларнинг барчаси учун ибодат зарур. Биродаримнинг кундузги ибодатини кузатиш жуда завқли бўлди”, деб изоҳ ёзган Энтони. Спортчи бу сурат Дубайда олингани ва унда дўстининг ибодат қилаётганини айтган.
“Сен доим қалб амрига кўра иш тутишинг керак, бировларнинг гапига қараб эмас. Мен ўз йўлимга эга инсонман. Менинг энг яқин дўстим мусулмон. Биз бирга мусулмонлар истиқомат қиладиган Дубайга бордик. Бирга масжидга кирдик ва у ибодат қилди. Мен эса Кличко билан бўладиган жангда ғолиблик учун дуо қилишини сўрадим. У мени ибодат залига олиб кирди ва бу ҳолатни кимдир суратга олган. Сурат менга ёқди ва тармоққа жойладим. Мен боксдаги идеалларимдан бири бўлган ва шу динга эътиқод қилган Муҳаммад Али ҳурмати учун ҳам расмни пост қилдим”, дейди жаҳон чемпиони Энтони Жошуа.
Эслатиб ўтамиз, бокснинг IBF йўналиши чемпиони британиялик Энтони Жошуа Англиянинг Лондон шаҳридаги “Уэмбли” стадионида ўтказилган собиқ жаҳон чемпиони украиналик Владимир Кличкога қарши жангда ғалаба қозониб, супер оғир вазнда мутлоқ жаҳон чемпиони, деган унвонга эришди.
Манба: Sportarena.com
