Банк биноси ўрнига масжид бунёд этилади
Жуда кўп черковлари билан ном қозонган АҚШнинг Малика Анна шаҳарчаси мусулмонлари ҳам эндиликда ўз масжидларига эга бўладилар. Ушбу масжид маҳаллий аҳоли томонидан ташкил этилган “Малика Анна Ислом ташкилоти” томонидан барпо қилинади. Ташкилот шу ердаги эски банк биносини сотиб олиб у ерга масжид қуришни режалаштирган.
Ислом динини қабул қилганига 35 йил бўлган маҳаллий имом ва Ислом ташкилоти раҳбари Брайан Митчел: “Бу ер марказ саналади ва барча учун ўта қулай бўлади”, дейди.
Аввалига, маҳаллий мусулмонлар жамоат намозларини адо этиш учун Мерилэнд университети ҳудудидаги кичик ибодатхонада жамланишар эди. Лекин, 2011 йилга келиб шаҳарда мусулмонлар сони кўпайиб кетди ва эндиликда жамоат намозлари учун каттароқ ҳудудга зарурат туғилди.
Қурилажак масжид учун банк биносини ташкилот ҳайри – эҳсонлар ёрдамида 100 000 доллар эвазига сотиб олди. Ҳозирда у ерда масжид қурилиши ишлари бошланган.
Тез орада қуриб битирилажак масжидга яқин атрофда яшовчи 200 хонадондаги мусулмонлар, ҳамда Мерилэнд университети талабалари келишади, дейди имом Митчел.
