Грозныйдаги ифторнинг кутилмаган меҳмонлари
11 июн куни Чеченистоннинг Грозный шаҳрида бўлиб ўтган ифторлик тадбирида 20 мингдан ортиқ мусулмон иштирок этди.
“Чеченистон қалби” масжиди олдидаги майдонда тикланган чодирларда тузалган дастурхонга Доғистон, Татаристон, Ингушетия ва ҳаттоки чет элдан келган меҳмонлар ҳам йиғилишди.
Ифторликнинг асосий таоми бўлган ошни ўзбекистонлик ошпазлар ҳозирлашди.
Ифторнинг кутилмаган меҳмонлари Жаҳон Чемпионати қатнашчиси бўлган Миср терма жамоасининг машқларини кузатишга келган Мисрлик, Иорданиялик ва бошқа араб давлатларидан мухлислар бўлишди.
“Мен Иорданияданман. Менинг дўстларим эса Мисрдан. Биз бу ерга терма жамоанинг машқларини кўриш учун келган эдик. Лекин майдон ёпиқлиги сабаб у ерга киролмадик. Бироқ биз чечен биродарларимиз ташкил қилган мана шундай гўзал тадбир меҳмони бўлдик”, дейди Абдулла Хважиев.
Ушбу ифторлик тадбири билан бир вақтда Фирдавс тантаналар саройида ҳам саратон касалликлари билан хасталанган беморлар, имконияти чекланган кишилар ва бошқа минтақанинг ночор аҳолиси қатлами учун ифторлик тадбири бўлиб ўтди. Тадбир якунида эса 48 нафар муҳтож оилага янги хонадон калитлари ва катта миқдорлаги пул мукофотлари ҳадя қилинди.
