АҚШда мусулмон талабалар ўз ҳаётлари эвазига ўзга болаларнинг ҳаётларини сақлаб қолишди
Саудия Арабистонидан келган икки талаба АҚШлик болаларни ўз ҳаётлари эвазига ҳалокатдан сақлаб қолишди.
Фожеа 29 июн, жума кунида содир бўлди. 27 ёшли Теб ал Ямий ва 25 ёшли Жазир ал Рака Чикопо соҳилида болаларини қутқаришларини илтимос қилиб, ёрдам сўраётган аёлга дуч келишади ва ҳеч нарсани ўйлаб ўтирмай ўзларини сувга отишади.
Икки қаҳрамон сувдаги чўкаётган болаларни қутқаришга улгуришди, лекин бехосдан кучайган оқимга қаршилик қилолмай ўзлари оқим қуршовида қолиб кетишди. Уларнинг мурдалари бир неча кундан сўнг сув тубидан топилган.
Маълум бўлишича, икки қаҳрамон талаба асли тутинган ака-ука бўлиб, АҚШдаги маҳаллий қурилиш ва муҳандислик университетида таҳсил олишган.
АҚШ давлат Департаменти ҳалок бўлган талабаларнинг оила аъзоларига ўз ҳамдардликларини билдирди. Департаментнинг ҳамдардилк мактубида битилишича, “мана шундай довюрак ва олийжаноб мусулмон талабаларнинг хатти-ҳаракатлари АҚШ жамиятини эзгуликка тўлдириб туради”.