Фарзанд токи ўзи мустақил пул топа оладиган даражага етмагунча отасининг молидан озиқланишида унга бирор зарар ва гуноҳ бўлмайди иншоаллоҳ. Бу ҳолатда агар ота шариатда таъқиқланган ишлар билан пул топаётган бўлсада унинг гуноҳи отасининг ўзига бўлади ва ёш болаларга гуноҳ бўлмайди. Аммо, барибир бу ҳолат фарзандларнинг камол топиб, олий фазилатлар касб этишига монеълик қилиши мумкин. Ўтган улуғларимиз фарзандлари камолга етиб, олиму фозил бўлиб етишишлари учун биринчи галда ҳалқум поклигига, касб-кор ҳалолдан бўлишига ғоят жиддий аҳамият берганлар. Бунинг самараси ўлароқ юртимиздан дунёни ларзага солган забардаст алломалар етишиб чиққанлар. Зеро, ҳалолликнинг фарзанд камолига таъсири шубҳасиздир. Саволда сўралган ҳолатда отага чиройли ва юмшоқ тарзда тушунтириш тавсия этилади. Қўполлик қилиб, диллари ранжитилмайди. Ва аҳвол яхшиланишида Аллоҳга дуою илтижода бўлиш муҳимроқ. Ана шунда иншоаллоҳ ҳаммаси жойига тушиб кетади. Валлоҳу аълам!