Ва алайкум ассалом. Абдулқодир ибн Мусо ибн Абдуллоҳ ибн Жанкидуст Абу Муҳаммад Муҳйиддин Ҳасаний Жийлоний (мел. 1078-1166, ҳиж. 471-561) машҳур сўфий ва зоҳидлардан, қодирия тариқати асосчиси саналади. У Табаристоннинг Жийлонида туғилган. Йигитлигида Бағдодга бориб, у ерда илм ва тасавввуф аҳлини ўзига лозим тутган. У ваъз-насиҳат айтишда машҳур саналган. Бағдодда дарс ва фатво беришга бошчилик қилган. Абдулқодир Жийлоний мелодий 1166, ҳижрий 561 йилда Бағдодда вафот этган.

   Абдулқодир Жилонийнинг бир қанча китоблари бор. Унинг маноқибига оид кўплаб китоблар ҳам ёзилган. У кишининг издошлари ва бошқалар сиз айтган муболаға гапларни тўқиб чиқаришган. Оддий банданинг ўлик одамни тирилтириши мумкин эмас. Бу сифат Аллоҳ таологагина хосдир. Пайғамбарлардан Исо алайҳиссаломга ўликларни тирилтириш мўъжизаси берилгани Қуръони каримда айтилган. Аммо у киши ҳам “Аллоҳнинг изни билан ўликларни тирилтираман”, деб таъкидлаб ўтган. Шундай экан, бу каби ҳодисалар ҳақидаги ривоятларнинг асоси йўқ, десак бўлади. Уларга чалғиш керак эмас. Тўғри, биз Абдулқодир Жийлонийнинг ўта тақводор, валий зот ва каромат соҳиби бўлганини биламиз. Аммо сиз айтганингиздек, енглари остида жаннат ва дўзахни кўрсатганлари ҳақиқатга тўғри келмайди. Валлоҳу аълам!