“Намозни қайтадан ўқишим керакми?” 14.07.2017
Савол:“Ассалому алайкум. Жунубликдан ғусл қилгач, орадан 30 дақиқалар чамаси вақт ўтгандан сўнг ички кийимларимда маний борлигини кўриб, сув билан яхшилаб истинжо қилиб, таҳорат олиб, шом намозини ўқидим. Мазкур таҳоратим билан хуфтон намозини ҳам ўқидим. Хуфтондан сўнг, таҳоратхонага борганимда ички кийимларимда қотиб қолган маний қолдиғига кўзим тушди. Хуфтон намозини қайта ўқимадим. Устоз, айтингчи, мен тўғри иш қилдимми? Шундай ҳолатларда нима қилиш керак?”.
Булим Ибодат масалалари19735
“Ва алайкум ассалом. Саволингизнинг аввалида шом намозидан олдин ички кийимларингизда маний борлигини кўрганингизни айтгансиз. Бу ҳолатда аввал ўша ички кийимни ечиб ташлаб, сўнг истинжо қилиш мақсадга мувофиқ бўларди. Иккинчидан, жунубликдан ғусл қилгач, аъзодан маний ёки мазий сизиб чиқса, қайтадан ғусл қилиш шарт эмас. Балки, бундай ҳолатда, намоз ўқишдан олдин истинжо қилиб, либосни поклаб, таҳорат қилиб олиш кифоя қилади. Учинчидан, намоз ўқиш учун таҳорат қилиш шарт. Таҳоратсиз ўқилган намоз қабул бўлмайди. Тўртинчидан, намозда закардан намлик ёки орқадан ел чиққандек туюлса ва таҳорати кетган ёки кетмаганлиги ҳақида васвасага тушса, намоз давом эттирилади, бузилмайди. Бироқ, аъзодан бавл ёки мазий ёки орқадан ел чиққанини аниқ билса, намозни ўша жойда тўхтатган ҳолда ҳеч нарсага эътибор қаратмасдан, бошқа юмушларга шўнғимасдан тўғри таҳорат қилиб келиб, намозни келган жойидан давом эттириш мумкин. Агар шом ёки хуфтонни бетаҳорат ўқиганингизга ишончингиз комил бўлса, намозни қайтадан ўқийсиз. Валлоҳу аълам”.