Маҳси ечилса, таҳорат синадими? 26.02.2017
Савол:Ассалому алайкум! Махсни ечса таҳорат синадими?
Булим Фиқҳ5976
Ва алайкум ассалом. Маҳсини ечиш билан унга тортилган масҳ бузилади. Бир пойи ечиладими ёки иккала пойими, фарқи йўқ.
Муғийра ибн Шуъба розияллоҳу анҳудан ривоят қилинади: “Биз Расулуллоҳ соллаллоҳу алайҳи ва саллам билан ғазотда қатнашдик. У зот бизни маҳсига масҳ тортишга буюрдилар. Агар маҳсини ечмаса, мусофир уч кеча-уч кундуз, муқим бир кеча-бир кундуз масҳ тортиши мумкинлигини айтдилар” (Табароний ва Байҳақий ривоят қилган).
Маҳси ечилиши билан аввалги бетаҳоратлик оёққа ўтади. Агар маҳси ечилганда кишининг таҳорати бўлмаса, тўлиқ таҳорат қилиб, кейин намоз ўқийди. Агар масҳ тортиш муддати тугамасдан олдин маҳси ечилганда, киши таҳоратли бўлса, фақат оёғини ювади, янгидан таҳорат қилиши шарт эмас.
Иброҳимдан ривоят қилинишича, Алқама ва Асваддан, таҳорат қилиб, маҳсига масҳ торган, кейин уни ечган киши ҳақида сўралганда, у иккиси: “Оёғини ювади”, деб жавоб беришган (Дорақутний ва Байҳақий ривоят қилган).
Хуллас, маҳси ечилганида кишининг таҳорати бўлмаса, янгидан таҳорат қилади. Бунда маҳсига тортилган масҳ бутунлай синади. Агар маҳсисини ечган одамнинг таҳорати бўлса, у ҳолда оёғининг ўзини ювиб олса бўлди. Валлоҳу аълам!
Манба: “Таҳорат китоби”