Ва алайкум ассалом. Ҳукмда масъул одамнинг пора олиши ҳаромдир. Бу борада ҳеч қандай ихтилоф йўқ. Сабаби бу зулмга, ҳақ-ҳуқуқлар поймол қилинишига олиб боради. Бунда пора талаб қилиш, уни бериш, қабул қилиш, ўртада воситачилик қилиш ҳаром. Чунончи, пора бериб бирон лавозимга эришиш мумкин эмас. Чунки ўша лавозим ёки ишга сиз билан бирга бошқалар ҳам ҳақлидир. Агар сиз пора бериб ишга кирсангиз, бошқаларнинг илми, истеъдоди қадрланишига, ҳақиқат қарор топишига тўсқинлик қилган бўласиз. Пора бериб ишга кирадиганлар кўпайса, жамиятда малакали мутахассислар танқислиги пайдо бўлади. Сабаби пули бор одам ишга киради, пули йўқ, аммо илми, малакаси юқори кадрлар мардикорчилик қилиб ёки бозорда арава судраб юраверади. Пора берган “бойлар” бирон-бир мансабни ўзлари муносиб бўлмаган ҳолда эгаллаб, жамиятга зарар етказадилар. Тараққиётдан ортда қолиш сабабларининг энг каттаси мана шу.
    Бироқ, уламолар каттароқ зарарни даф қилиш учун пора бериш жоизлигини айтишган. Шунингдек, бирон нарса фақат кишининг ўзига тегишли бўлса-ю, уни қўлга киритишга баъзи нарсалар тўсиқ қилаётган бўлса, пора билан ўша нарсага эришиш жоиз, дейишган. Фақат бунда бошқалар сиз билан бир хил ҳуқуққа эга бўлмаслиги керак. Агар касб қилинадиган нарсага сиз ва бошқалар бир хилда эришиши имкони бўлса-ю, бунда илм ва тажриба муҳим ўрин тутса, унга пора билан эришилса, жоиз бўлмайди, дейилади.
     Валлоҳу аълам!