Ва алайкум ассалом. Аллоҳ таоло Ўзи яратган махлуқотларга Ўзи хоҳлаган хусусиятни сингдириши мумкин. Масалан, ақлни олайлик. Биз ақл фақат инсонгагина берилган, деб ўйлаймиз. Аслида жин ва фаришталарда ҳам ақл бор. Маълумот ўрнида шуни айтиб ўтиш керак: жинлар ҳам биз каби Аллоҳга имон келтиришга, У Зот буюрган амалларни бажаришга, ҳаром ишлардан тийилишга буюрилган. Аллоҳнинг буйруқларини бажариш учун ақл керак. Агар жинларда ақл бўлмаганида Аллоҳ уларни мукаллаф қилмасди.
   Аллоҳ фаришталарни турли вазифаларга тайинлаган. Масалан, Жаброил алайҳиссалом ваҳий фариштаси, Исрофил сур чалувчи фариштадир. Яна қанчадан-қанча фаришталар бор, улар Аллоҳнинг амридан зинҳор четга чиқмай, У Зот буюрган ишларни бажарадилар. Улар шунинг учун яратилган. Баъзи ривоятларда маълум гуруҳ фаришталар тинмай рукуъда туришлари, бошқалари доим сажда қилган ҳолда бўлишлари айтилган.
   Энди фаришталарга ақл берилгани ҳақида тўхталадиган бўлсак, Аллоҳ таоло Бақара сурасининг аввалги оятларида, яъни Одам алайҳиссаломнинг яратилиш қиссасида фаришталарнинг: “У ерда бузғунчилик қиладиган, қонлар тўкадиган кимсани (халифа) қиласанми? Ҳолбуки, биз ҳамду сано айтиш билан Сени улуғлаймиз, Сенинг поклигингни эътироф этамиз”, деган сўзларини келтирган. Бундан ташқари бошқа оятларда келишича, фаришталар мўмин бандалар гуноҳлари кечирилишини Аллоҳдан сўрайдилар, ҳадиси шарифларда мусулмон узоқдаги (ғоибдаги) мусулмон биродари ҳаққига холис дуо қилинганида, бир фаришта: “Омин”, деб туриши айтилган. Демак, фаришталар Аллоҳга мурожаат қилар, мўминлар ҳаққига истиғфор айтар, дуолари ижобат бўлишини сўрар эканлар, бу ишларни бажариш учун ақл керак. Жумладан, гапириш учун ақл, фикрлаш лозим. Ақлсиз жумла тузиш мумкин эмас. Бундан, фаришталарда ақл бор, деган хулоса чиқади. Аммо уларнинг ақли билан бандалар ақли ўртасида биз билган, билмаган фарқлар бор. Бу ҳақида ортиқча гап айтиш тўғри эмас. Муҳими биз фаришталар мавжудлигига, уларни Аллоҳ яратганига, турли вазифаларни топширганига имон келтирсак, кифоя қилади. Валлоҳу аълам!