Саволлар ва жавоблар

 

Мавзу:

Никоҳ ўқигани учун домлага қанча берилади? 13.02.2016

Савол:

Ассалому алайкум, Одилхон қори ака. Сизга бир саволим бор эди: никоҳ ўқиган домлага қанча берилади? Бу масалада ҳаммадан ҳар хил фикр эшитдим. Кимдир 100 минг деса, кимдир 50 минг дейди. Кимдир: “Никоҳ ўқиб қўйиш домланинг бурчи. Кўнглингдан чиқариб берсанг бўлаверади”, дейди. Ўтган йили бир қаримдошим домлага 50 минг берганида, домла: “Бу берганинг кам, яна бер”, деган эди. Шу масалада ҳам фикр билдирсангиз. Жавобларингиз учун олдиндан раҳмат!

Жавоб:

Ва алайкум ассалом. Аввало, никоҳ ўқиган домла: “Фалон сўм берасан!” деб қатъий талаб қилмайди. Ҳамма кўнгилдан чиқариб бераверади. Чунончи, никоҳ ўқишнинг аниқ белгилаб қўйилган нархи (ставкаси) йўқ!
    Иккинчидан, одамлар не-не исрофгарчиликларга пулни аямайдилар. Аммо никоҳ ўқитишга келганда, “Шунча бериш керак экан”, “Домла бунча сўрабди”, деб оғринадилар. Ҳолбуки, берсангиз, сизни бегона аёл билан бир ёстиққа бош қўйишингизни ҳалоллаб берган, оилангизга бахт-саодат сўраб дуо қилган одамга беряпсиз, қулоқни битириб, кўнгилни беҳузур қиладиган машшоқларга ёки ижараси миллион-миллион турадиган бир марталик никоҳ либосига эмас!
    Учинчидан, юртимизда фаолият олиб бораётган кўпгина имомлар ўзларининг касб-корига эга. Имомлик улар учун асосий тирикчилик манбаи эмас. Айримлар сиз айтгандек, “Фалон сўм берасан”, деб талаб қилган бўлса бордир...
     Одамлар, имомлик осон иш эмаслигини, имомлар робот эмас, ўзларига ўхшаган инсон эканини тушунишларини истардик!