Тил ўрганиш мия қаришини секинлаштиради
Олимларнинг таъкидлашича, она тилидан бошқа тилда сўзловчи ва ўрганувчи катталар ва болалар янги тилдаги луғат бойлигини ўзлаштириш, тилни ўрганиш ва грамматик қоидаларни тушуниш учун катта куч сарфлайдилар. Шунингдек, 2-тилни ўрганиш кексалар учун ижобий таъсир қилади.
Иккинчи, бегона тилни ўрганиш нафақат дунёқарашни кенгайтириб, ақлни чархлайди, балки мия қаришини ҳам секинлаштириши маълум бўлди. Тадқиқотчиларнинг фикрича, мактабларда ўз она тилидан бошқа тилда сўзлашувчи гуруҳларда ўқувчи болалар рағбатланитириб турилиши лозим.
Олимлар, 2-тилни ўрганувчилар ва ўз она тилидан бошқа тилни билмайдиганлар орасида тадқиқот ўтказдилар. Икки тилни билувчи болалар қолганларга нисбатан, зеҳнлироқ, қийин вазиятлардан тезроқ чиқиб кета олувчи ва ақлий меҳнатга мойил экани маълум бўлди.
Шуни қўшимча қилиш лозимки, иккинчи тилни ўрганишни бошлаган катта ёшли кишиларда ҳам интеллектуал қобилиятнинг яхшиланиши кузатилган.
“Яна бир тадқиқот эса шуни кўрсатди: қарилик белгилари бўлмиш, ақл заифлашишининг барча турлари иккинчи тилни ўрганувчиларда қолганларга нисбатан 4-5 йил кейин пайдо бўлар экан”. Мана шулардан келиб чиқиб олимлар мактабларда иккинчи тил ҳам кенг ўргатилишини таклиф қилдилар.
