Мисрликлар рамазонда озиқ-овқатга қанча пул сарфлайди?

Рамазон ойида мисрлик оилаларнинг сарф-харажати сезиларли даражада ошади. Магазиндаги нарх-наволар ҳам юқорига қараб интилади.

"Рамазон ойининг ўзига хос анъаналари ва ўзига хос кайфияти бор. Бу вақтда харидорларнинг ўзини тутиши юз фоиз ўзгаради. Оиланинг ўртача озиқ-овқат харид қилиши ортади. Ўтган йили мисрликлар рамазон ойида 41 миллиард миср фунти (тахминан, 2.3 миллиард доллар – таҳр.)сарфлашган. Бу йил эса ушбу рақам – 51 миллиардга (3 миллиард доллар) бориши кутилмоқда", дейди Миср иқтисодий тадқиқотлар клуби директори Рашад Абдо.

Унинг таъкидлашича, кўплаб мисрлик оилалар бу ойга, айниқса, озиқ-овақт масаласида жуда катта эътибор қаратадилар. "Улар пулларини фақат ўзларининг оиласи учун эмас, балки камбағал қўшнилари ва кўчалардаги қашшоқларга ҳам сарфлайдилар. Ўзига тўқ одамлар шундоқ кўчаларнинг бўйларида ифторликлар ва саҳарликлар ташкил қилади. Бу ифторлик ва саҳарликларнинг ҳар бирида бир неча ўнлаб, юзлаб ҳатто ўзлари учун оддийгина ифторлик дастурхони тузашга ҳам иложи етмайдиган рўзадорлар меҳмон бўлади. Ана шу сарфу харажатлар ҳам умумрамазон чекига киради, дейди Абдо.