“Qorilar musobaqasi” natijalari

 Ma’naviy yangilanish yo‘lidan dadil odimlab borayotgan yurtimizda muqaddas dinimizga alohida e’tibor berila boshlandi. Jumladan, islom bilim yurtlari faoliyati tubdan yaxshilandi. Buning zamirida islom dinini asl holatida o‘rganishga bo‘lgan ehtiyojni qondirish, diyorimiz allomalarining dinimizga oid boy ma’naviy me’rosini tadqiq etib, ularni xalqimizga sodda va ravon uslubda yetkazish, zamon talablari darajasidagi malakali diniy mutaxassislarni tayyorlash maqsad qilib qo‘yilgan.

 Alloh taologa beadad shukrlar bo‘lsinki, jamiyatimizda ro‘y bergan ijobiy o‘zgarishlar mamlakatimiz musulmonlari hayotida ham ulkan burilishlarga sabab bo‘ldi. Respublikamiz xalqaro maydonda  o‘z o‘rnini topdi. Har yili turli mamlakatlarda o‘tkaziladigan Xalqaro Qur’on musobaqalarida diyorimizda yetishib chiqayotgan qorilarimiz ham qatnashib, nufuzli o‘rinlarni egallashmoqda.

 Bugun poytaxtdagi “Xoja Alambardor” jome masjidida O‘zbekiston musulmonlari idorasi tasarrufidagi Toshkent islom instituti, Islom universiteti va o‘rta maxsus islom bilim yurtlari talabalari ishtirokida  “Qorilar musobaqasi” ko‘rik-tanlovining Respublika bosqichi o‘tkazildi. An’anaviy tarzda o‘tkazilayotgan bunday ko‘rik-tanlov yurtdoshlarimizning Qur’oni karimni o‘qib-o‘rganish, yodlash, tinglash hamda tajvid qoidalarini yanada puxta o‘rganishga bo‘lgan mehr-muhabbatining oshishiga sabab bo‘lmoqda.

 Qur’oni karimni yodlagan iqtidorli talabalarni aniqlash, qo‘llab-quvvatlash,  ulardagi noyob fazilatlarni  yanada rivojlantirish maqsadida tashkil etilgan “Qorilar musobaqasi”ning Respublika bosqichi ikki yo‘nalishda o‘tkazildi. Birinchi yo‘nalish murattab qorilar, ikkinchi yo‘nalish mujavvid qorilar o‘rtasida bo‘lib o‘tdi.

Ko‘rik-tanlov natijalari quyidagicha bo‘ldi:

Murattab qori yigitlardan:

1-oliy o‘ringa Toshkent islom instituti talabasi Rahmonberdi Abdulaziz qori;

1-o‘ringa Sayyid Muhyiddin Maxdum madrasasi talabasi Abdumalikov Sirojiddin qori; 

2-o‘ringa Ko‘kaldosh madrasasi talabasi Abdumalikov Nizomiddin qori;

 3-o‘ringa Mir Arab madrasasi talabasi Mirboboyev Mirabbos; 

Mujavvid qori yigitlardan:

1-o‘ringa Faxriddin ar-Roziy madrasasi talabasi Homidov Muhammadyusuf;

2-o‘ringa Muhammad al-Beruniy madrasasi talabasi Pirxonov Nasibilloh qori;

3-o‘ringa Mir Arab madrasasi talabasi Ahmadjonov Qodirali; 

Murattab  qoriya qizlardan:

1-o‘ringa Xadichai Kubro madrasasi talabasi Ishoqjonova Muhsina;

2-o‘ringa Toshkent islom instituti talabasi Nurmatova Shohistaxon;

3-o‘ringa Jo‘ybori Kalon madrasasi talabasi Yahyoyeva Shahnoza; 

Mujavvid qoriya qizlardan:

1-oliy o‘ringa Toshkent islom instituti talabasi Najmiddinova Robiya;

1-o‘ringa Xadichai Kubro madrasasi talabasi Umaraliyeva Dilnozaxon;

2-o‘ringa Jo‘ybori Kalon madrasasi talabasi O‘rinova Lutfiya;

3-o‘ringa Toshkent islom universiteti talabasi Jaloliddinova Mahfuza munosib deb topildi.

Ko‘rik-tanlov g‘oliblari O‘zbekiston musulmonlari idorasi hamda homiylar tomonidan tashkil etilgan diplom va qimmatbaho sovg‘alar bilan taqdirlandilar.