Dinimiz musaffoligi yo‘lida

   Har kuni ommaviy axborot vositalari orqali dunyoning qaysi bir chekkasida sodir etilgan vahshiy terrorchilik harakatining guvohi bo‘lganimizda, ba’zi nodon, johil kimsalarning jirkanch faoliyati muqaddas dinimizga nisbat berilganida beixtiyor chuqur qayg‘uga tushamiz, qalbimiz afsus-nadomat chekadi.

   Nafaqat musulmonlar, balki ishonch va e’tiqodidan qat’iy nazar butun insoniyat uchun alamli bo‘lgan bu kabi holatlarga barham berishning eng samarali yo‘li odamlarning dunyoqarashini kengaytirish, islom dinining tinchlik va omonlik dini ekanini targ‘ib etishdir. 

   Shu maqsadda, 2017 yilning 22 mart kuni "To‘xtaboy" jome masjidi imom-xatibi Ishoqjon Begmatov Olmazor tumani "Guzarboshi" mahallasi aholisi bilan "Ekstremistik va terrorchi oqimlarning soxta da’volari" mavzusida suhbat o‘tkazdi. Imom-xatib jahonda, xususan, musulmon o‘lkalarida sodir bo‘layotgan xunrezliklarning muqaddas dinimizga daxli yo‘qligini Qur’oni Karim oyatlari va hadisi shariflar bilan yoritib berdi. Shuningdek, Ishoqjon Begmatov tinchlikni avaylab-asrash, doimo xushyor yashash kerakligi, musulmonlar namunali xulqi, odob-axloqi bilan o‘zgalarga o‘rnak bo‘lishi lozimligi, doimo ilmga intilib yashashi darkorligini ta’kidladi.

   Suhbat yakunida ishtirokchilarga "Dunyo ulamolari murojaati", "IShID fitnasi", "Internetdagi tahdidlardan himoya" kitoblari taqdim etildi.

   Manba:vakillik.uz