Arxangelskda tarixiy masjid ochildi

3 fevral kuni Arxangelskda tarixiy masjidning ochilish marosimi bo‘lib o‘tdi, deya xabar beradi Rossiya Federatsiyasi Musulmonlari Diniy Boshqarmasi.

Arxangelsk chetidagi tatarlar shaharchasida joylashgan mazkur masjid ilk bor 1905 yilda mahalliy musulmonlar tomonidan yog‘ochdan qurilgan edi. Masjidda bo‘lib o‘tgan yong‘in tufayli masjid binosi katta talofat ko‘radi va 2014 yilda tarixiy binoning asli nusxasidek qayta tiklanadi.

Masjidning ochilish marosimida Arxangelsk viloyati gubernatori Igor Orlov, Tatariston prezidenti Rustam Minnixanov, “Ak-Bars” xolding jamiyati bosh direktori Ivan Yevgorov hamda pravoslav va yaxudiy jamiyatlari vakilari ishtirok etishdi.

Viloyat gubernatori Orlov o‘z nutqida shunday dedi: “Mazkur masjidning ochilishi nafaqat tarixiy adolatni tiklash, balki, kelajak uchun asos yaratishga ham zamin bo‘ladi. Bu Arxangelsk musulmonlari va boshqa din vakillari uchun ulkan voqeadir. Bu ma’naviyatning tug‘ilishidir. Uning tarixiy va madaniy qiymati tarixda qolajak”.