Pulning qadrsizlanishi va qarz masalasi
Savol:Assalomu alaykum. Yana bir masalaga oydinlik kiritib bersangiz degan umiddasizga murojaat qilyapman. Bir vaqtlar qo‘shnim mendan qarz olgan edi. Topish-tutishi yomon emas. Hatto xo‘jalik ishlarida ham bozordan mardikor yollab ishlatadi. Bizda har bir xarajatimiz rejali, tejab ishlatamiz, o‘rtahol oilamiz. Bir-ikki marotaba eslatdim, “bo‘lsa,olib chiqib ber”,dedim. Lekin oradan ancha vaqt o‘tib ketdi. Kuni kecha o‘sha olgan qarzini olib chiqib berdi. So‘mda olgan edi. Sir emaski,hozirgi kunda ko‘pgina narsalar chet eldan keltirilayotgani uchun AQSh dollarida baholanadi. Oshsa oshadi, tushsa tushadi. Ancha vaqt o‘tganligi uchun men bergan so‘mdagi pul miqdori o‘z qadr-qiymatini yo‘qotib bo‘lgandi. Ochig‘i,biroz ensam qotdi. Pulga rostdan ham muhtoj inson bo‘lganida mayli edi. Dorixonaga ham taksida chiqib keladigan odam bo‘lgani uchun alam qildi. Sudxo‘rlik bo‘lmasin, biz ortig‘iga kelishmaganmiz deb indamay oldim.
Hurmatli Ustoz! Odamlar orasida bunday vaziyatlar ko‘p bo‘lishi haqida o‘ylab qoldim va sizga shu masala yuzasidan murojat qilishga qaror qildim. Meniki-ku, mayli, unchalik katta miqdorda emas. Lekin ba’zi odamlar juda katta pul oldi-berdisini qiladilar. Ular shunday vaziyatga tushsalar,qanday yo‘l tutishlari kerak? Iltimos,shu haqida ma’lumot bersangiz!Alloh sizdan rozi bo‘lsin!
Bo`lim Muomalotlar9700
Va alaykum assalom. Avvalo, qarz oldi-berdisini yozib, guvohlar ishtirokida hujjatli qilib qo‘yiladi. Shunda orada turli muammo chiqmaydi. Chiqqan taqdirda ham ana o‘sha xatga muvofiq hal etiladi.
Qarzni o‘z miqdorida qaytarish lozim. 100.000 so‘m olib, keyin 150.000 ming so‘m qilib qaytarish sudxo‘rlikdir. Agar uzoqroq muddatga olinayotgan bo‘lsa, o‘zaro kelishib, chet el valyutasi kursida hisoblab qo‘ysa ham bo‘ladi. Masalan, birovga 1.500.000 so‘m berib, dollarda yoki yevroda mana buncha bo‘ladi, qarzni mana shu valyutada qaytarasiz, deb kelishib olsa bo‘ladi. Shunda ribo ham bo‘lmaydi, pulning qadrsizlanishi ham hisobga olinadi. Vallohu a’lam!
